ಧರ್ಮ ಜಾಗೃತಿಗೆ ಮಠಗಳು ಅಗತ್ಯ :ಶಿವಪ್ರಕಾಶ ಶ್ರೀ

ಬಸವನಬಾಗೇವಾಡಿ: ಜಗತ್ತಿನಲ್ಲಿ ಧರ್ಮ ಜಾಗೃತಿ ಮೂಡಿಸಲು ಶ್ರೀಮಠಗಳು ಅಗತ್ಯವಿದೆ. ಸಮಾಜದಲ್ಲಿ ಮಠ-ಗುರುವಿನ ಪಾತ್ರ ದೊಡ್ಡದಿದೆ ಎಂದು ಬಸವನಬಾಗೇವಾಡಿ ಹಿರೇಮಠದ ಶಿವಪ್ರಕಾಶ ಶಿವಾಚಾರ್ಯ ಸ್ವಾಮೀಜಿ ಹೇಳಿದರು.
ತಾಲೂಕಿನ ಮುತ್ತಗಿ ಗ್ರಾಮದ ಹಿರೇಮಠದ ಲಿಂ.ರುದ್ರಮುನಿ ಶಿವಾಚಾರ್ಯರ ೮೬ ನೇ ಪುಣ್ಯರಾಧನೆಯ ಜಾತ್ರಾಮಹೋತ್ಸವದಂಗವಾಗಿ ಶುಕ್ರವಾರ ಹಮ್ಮಿಕೊಂಡಿದ್ದ ಧರ್ಮಸಭೆ ಹಾಗೂ ಪುರಾಣ ಮಂಗಲ ಕಾರ್ಯಕ್ರಮದ ಸಮ್ಮುಖ ವಹಿಸಿ ಮಾತನಾಡಿದ ಅವರು, ಗುರು-ಭಕ್ತರ ಸಂಬಂಧ ತಾಯಿ-ಮಕ್ಕಳ, ನೀರು-ಮೀನು ನಡುವೆ ಇರುವ ಸಂಬಂಧವಿದ್ದಂತೆ. ನೀರಿನ ಕಲ್ಮಷ ಸ್ವಚ್ಛ ಮಾಡಲು ಮೀನು ಅಗತ್ಯವಿದೆ. ಅದರಂತೆ ಮೀನಿಗೆ ನೀರು ಅಗತ್ಯವಿದೆ. ನೀರಿಲ್ಲದೇ ಮೀನು ಇರಲು ಸಾಧ್ಯವಿಲ್ಲ. ಅದರಂತೆ ಗುರು-ಭಕ್ತರ ಸಂಬಂಧವಾಗಿದೆ. ಸಮಾಜಕ್ಕೆ ಗುರುವಿನ ಮಾರ್ಗದರ್ಶನ ಇರಬೇಕು. ಸಮಾಜದಲ್ಲಿನ ಅಜ್ಞಾನ ಕಳೆದುಹಾಕಲು ನಿರಂತರವಾಗಿ ಧಾರ್ಮಿಕ ಕಾರ್ಯಕ್ರಮಗಳು ನಡೆಯುತ್ತಿರಬೇಕು. ಈ ಶ್ರೀಮಠದ ಕರ್ತೃ ಲಿಂ. ರುದ್ರಮುನಿ ಶಿವಾಚಾರ್ಯ ಸ್ವಾಮೀಜಿಯವರ ಕರ್ತೃ ಶಕ್ತಿಯಿಂದ ನಿರಂತರವಾಗಿ ಜಾತ್ರೆಯು ಭಕ್ತರ ಸಹಕಾರದೊಂದಿಗೆ ನಡೆಯುತ್ತಿರುವುದು ಶ್ಲಾಘನೀಯ. ಮುಂದೆಯೂ ಇದೇ ರೀತಿಯಲ್ಲಿ ನಡೆಯುವಂತಾಗಲಿ ಎಂದರು.
ಜೀವನದಲ್ಲಿ ದಾನ,ಧರ್ಮ, ಪರೋಪಕಾರ ಗುಣಗಳನ್ನು ಮೈಗೂಡಿಸಿಕೊಂಡರೆ ಪುಣ್ಯ ಪ್ರಾಪ್ತಿಯಾಗುತ್ತದೆ. ಬಸವಾದಿ ಶರಣರು ನೀಡಿರುವ ಕಾಯಕ-ದಾಸೋಹ-ಅನುಭಾವ ಅರಿತುಕೊಂಡು ಜೀವನದಲ್ಲಿ ಸಾಗಬೇಕು. ಸಮಾಜಕ್ಕಾಗಿ ಬದುಕಿದವರನ್ನು ಸಮಾಜ ಎಂದಿಗೂ ಮರೆಯುವದಿಲ್ಲ. ನಾಡಿಗೆ ಸುಖ-ಶಾಂತಿ ಧರ್ಮದಿಂದ ಸಿಗಲು ಸಾಧ್ಯ ಎಂದರು.
ಚಿಮ್ಮಲಗಿಯ ಸಿದ್ದರೇಣುಕ ಶಿವಾಚಾರ್ಯ ಸ್ವಾಮೀಜಿ ಮಾತನಾಡಿ, ಯುವಜನತೆ ಗುರು-ಹಿರಿಯರಿಗೆ ಗೌರವ ಕೊಡುವ ಮೂಲಕ ಉತ್ತಮ ವ್ಯಕ್ತಿತ್ವ ರೂಪಿಸಿಕೊಳ್ಳಬೇಕು. ಎಲ್ಲರೂ ಧರ್ಮಯುತವಾದ ಜೀವನ ಪಾಲಿಸುವಂತಾಗಬೇಕೆಂದರು.
ಬದಾಮಿಯ ಶಿವಪೂಜಾ ಶಿವಾಚಾರ್ಯ ಸ್ವಾಮೀಜಿ ಮಾತನಾಡಿದರು.
ಸಾನಿಧ್ಯ ವಹಿಸಿದ್ದ ನಿಡಗುಂದಿಯ ರುದ್ರಮನಿ ಶಿವಾಚಾರ್ಯ ಸ್ವಾಮೀಜಿ, ನೇತೃತ್ವ ವಹಿಸಿದ್ದ ಶ್ರೀಮಠದ ರುದ್ರಮುನಿ ಶಿವಾಚಾರ್ಯ ಸ್ವಾಮೀಜಿ ಮಾತನಾಡಿದರು.
ಕಾರ್ಯಕ್ರಮದಲ್ಲಿ ಮುಳವಾಡದ ವಿರುಪಾಕ್ಷ ಶಿವಾಚಾರ್ಯ ಸ್ವಾಮೀಜಿ, ಪ್ರವಚನಕಾರ ಬಸವರಾಜ ಶಾಸ್ತ್ರೀಜಿ, ಮುಖಂಡರಾದ ಪ್ರೇಮಕುಮಾರ ಮ್ಯಾಗೇರಿ, ಭೀಮಶಿ ಜಗ್ಗಲ, ಸಿ.ಬಿ.ಮೇಟಿ, ಎಸ್.ಜಿ.ಪಾಟೀಲ, ಪ್ರಭುಗೌಡ ಪಾಟೀಲ ಇತರರು ಇದ್ದರು. ವೈ.ಕೆ.ಪತ್ತಾರ ಪ್ರಾಸ್ತವಿಕವಾಗಿ ಮಾತನಾಡಿದರು. ಎಸ್.ಎಚ್.ಚಿಮ್ಮಲಗಿ ಸ್ವಾಗತಿಸಿ,ನಿರೂಪಿಸಿದರು. ಆರ್.ಬಿ.ಬ್ಯಾಕೋಡ ವಂದಿಸಿದರು. ಕಾರ್ಯಕ್ರಮಕ್ಕೂ ಮುನ್ನ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಕುಂಭಮೇಳ, ಡೊಳ್ಳಿನ ವಾದ್ಯ ಮೇಳದೊಂದಿಗೆ ಲಿಂ.ರುದ್ರಮುನಿ ಶಿವಾಚಾರ್ಯ ಸ್ವಾಮೀಜಿಯವರ ಭಾವಚಿತ್ರದ ಮೆರವಣಿಗೆ, ಬೆಳಗ್ಗೆ ಲಿಂ.ರುದ್ರಮುನಿ ಶಿವಾಚಾರ್ಯ ಸ್ವಾಮೀಜಿಯವರ ಕರ್ತೃ ಗದ್ದುಗೆಗೆ ರುದ್ರಾಭಿಷೇಕ, ವಿಶೇಷ ಪೂಜೆ, ರೇವಣಸಿದ್ದ ಹಿರೇಮಠ ಅವರಿಂದ ಹೋಮ ನೆರವೇರಿಸಲಾಯಿತು.