ಅಥಣಿಯಲ್ಲಿ ಜನಪರ ಸೇವೆಗೆ ಸಾಕ್ಷಿಯಾದ ಬೀಳ್ಕೊಡುಗೆ

ಉದಯರಶ್ಮಿ ದಿನಪತ್ರಿಕೆ

ಅಥಣಿ: ಅಧಿಕಾರಿ ಎಂದರೆ ಕೇವಲ ಹುದ್ದೆಯಲ್ಲ, ಜನರ ಮನಸ್ಸಿನಲ್ಲಿ ಉಳಿಯುವ ಕೆಲಸ ಮಾಡಿದಾಗಲೇ ಆತ ನಿಜವಾದ ಅಧಿಕಾರಿ. ಅಂತಹ ಅಪರೂಪದ ಅಧಿಕಾರಿ ಸಿದರಾಯ ಭೋಸಗಿ ಎಂದು ಮುಖಂಡ ಚಿದಾನಂದ ಸವದಿ ಬಣ್ಣಿಸಿದರು.
ನಗರದ ರಾಯಲ್ ಹಾಲ್‌ನಲ್ಲಿ ನಡೆದ ಪದೋನ್ನತಿ ಹೊಂದಿದ ತಹಸೀಲ್ದಾರ್ ಸಿದರಾಯ ಭೋಸಗಿ ಅವರ ಬೀಳ್ಕೊಡುಗೆ ಸಮಾರಂಭದಲ್ಲಿ ಅವರು ಮಾತನಾಡಿದರು.
“ಪ್ರತಿಯೊಬ್ಬ ಅಧಿಕಾರಿಯನ್ನು ಸಮಾಜ ಗುರುತಿಸುವುದು ಆತ ಮಾಡಿದ ಜನಪರ ಕೆಲಸದಿಂದಲೇ. ಅಥಣಿಯ ಜನತೆಯ ಪ್ರೀತಿ ಗಳಿಸಿ, ಅತ್ಯುತ್ತಮ ಸೇವೆ ನೀಡಿದ ಜನಾನುರಾಗಿ ಅಧಿಕಾರಿ ಅಂದರೆ ಅದು ಸಿದರಾಯ ಭೋಸಗಿ. ಮುಂದೆ ಅವರಿಗೆ ಇನ್ನೂ ದೊಡ್ಡ ಹುದ್ದೆ ಸಿಗಲಿ” ಎಂದು ಸವದಿ ಹಾರೈಸಿದರು.
ಸಮಾರಂಭದಲ್ಲಿ ಕಾಗವಾಡ ತಹಸೀಲ್ದಾರ್ ರವೀಂದ್ರ ಹಾದಿಮನಿ, ಶಿವಾನಂದ ಕಲ್ಲಾಪುರ, ಸಂತೋಷ ಹಳ್ಳೂರ, ವೆಂಕಟೇಶ ಕುಲಕರ್ಣಿ, ಗುರುರಾಜ ಸಂಪಣ್ಣವರ, ವೀರಣ್ಣ ವಾಲಿ, ಪ್ರವೀಣ ಹುಣಸಿಕಟ್ಟಿ, ರಾಮನಗೌಡ ಪಾಟೀಲ್, ಮಹಾದೇವ ಕೋಳಿ, ಎಂ.ಆರ್. ಮುಂಜೆ, ರವೀಂದ್ರ ಮುರಗಾಲಿ, ಪ್ರವೀಣ ಪಾಟೀಲ್, ಕರವೇ ಅಧ್ಯಕ್ಷ ಶಬ್ಬೀರ್ ಸಾತಬಚ್ಚೆ, ಕನ್ನಡಪರ ಹೋರಾಟಗಾರ ಅಣ್ಣಾಸಾಬ ತೆಲಸಂಗ, ಚುಸಾಪ ಅಧ್ಯಕ್ಷ ಡಾ. ರಾಮಣ್ಣ ದೊಡ್ಡನಿಂಗಪ್ಪಗೋಳ ಸೇರಿದಂತೆ ಕಂದಾಯ ಇಲಾಖೆ ಅಧಿಕಾರಿಗಳು, ನೌಕರರು, ವಿವಿಧ ಇಲಾಖೆ ಅಧಿಕಾರಿಗಳು, ಪತ್ರಕರ್ತರು ಹಾಗೂ ಸಾರ್ವಜನಿಕರು ಉಪಸ್ಥಿತರಿದ್ದರು.

“ಅಥಣಿ ನನ್ನ ಹೃದಯದಲ್ಲಿ ಶಾಶ್ವತ” – ಭೋಸಗಿ ಭಾವುಕ

ಸನ್ಮಾನ ಸ್ವೀಕರಿಸಿ ಮಾತನಾಡಿದ ಸಿದರಾಯ ಭೋಸಗಿ, ಅಥಣಿಯನ್ನು ನೆನೆದು ಭಾವುಕರಾದರು.
“ನನ್ನ ಸೇವಾ ಅವಧಿಯಲ್ಲಿ ನನ್ನ ಹೃದಯದಲ್ಲಿ ಶಾಶ್ವತವಾಗಿ ಉಳಿಯುವ ಊರು ಅಥಣಿ. ಅಧಿಕಾರಿಗಳು ಜನರೊಂದಿಗೆ ಸೌಜನ್ಯದಿಂದ ನಡೆದುಕೊಳ್ಳಬೇಕು. ಅವರ ಜಾಗದಲ್ಲಿ ನಿಂತು ಯೋಚಿಸಿ ಸ್ಪಂದಿಸಬೇಕು. ಬಡವರ ಕಷ್ಟಕ್ಕೆ ಸ್ಪಂದಿಸುವುದೇ ಕಂದಾಯ ಇಲಾಖೆಯ ಮೊದಲ ಆದ್ಯತೆ” ಎಂದರು.