ಭ್ರಾತೃತ್ವದ ಬಾಂಧವ್ಯಗಳ ಭಾವೈಕ್ಯತೆಯೇ ರಕ್ಷಾಬಂಧನ :ಅಂಗಡಿ

ಕೆಂಭಾವಿ: ಅಕ್ಕರೆಯ ಅನುಬಂಧ, ಭ್ರಾತೃತ್ವದ ಭಾವ ಬಂಧ, ಸಹೋದರ, ಸಹೋದರಿಯರ ಬಾಂಧವ್ಯದ ಸಂಬಂಧ, ಭಾವೈಕ್ಯತೆಯ ಮಧುರ ಮಂಕರದ, ಮನೆ ಮನೆಗಳಲ್ಲಿ ಸಡಗರ ಸಂಭ್ರಮದಿ ಆಚರಿಸುವ ಸಾಂಪ್ರದಾಯಿಕ ಹಬ್ಬವೇ ‘ರಕ್ಷಾಬಂಧನ’ ಎಂದು, ಹಿರಿಯ ವರ್ತಕರು ಹಾಗೂ ವಲಯ ಕಸಾಪದ ಗೌರವಾಧ್ಯಕ್ಷ ಸುಮಿತ್ರಪ್ಪ ಅಂಗಡಿ ಹೇಳಿದರು.
ಪಟ್ಟಣದ ಶ್ರೀ ಗುರು ಕಾಂತೇಶ್ವರ ಜನ ಕಲ್ಯಾಣ ಸೇವಾ ಪ್ರತಿಷ್ಠಾನದ ವತಿಯಿಂದ ಸೋಮವಾರ ಸಂಜೆ ಜರುಗಿದ ಮಾಸಿಕ ಹುಣ್ಣಿಮೆಯ ಶಿವಾನುಭವ ಗೋಷ್ಠಿಯನ್ನು ಉದ್ಘಾಟಿಸಿ ಮಾತನಾಡಿದ ಅವರು, ಆಧುನಿಕತೆಯ ಭರಾಟೆಯಲ್ಲಿ ಅಣ್ಣ, ತಮ್ಮ, ಅಕ್ಕ, ತಂಗಿಯ ಸಂಬಂಧಗಳ ಕಣ್ಮರೆಯಾಗುತ್ತಿವೆ ಎಂದವರು, ಶ್ರೀಮಂತ ಸಂಸ್ಕೃತಿಯ ವಾರಸುದಾರರಾದ ನಾವು ಸಂಸ್ಕಾರ, ಸಂಸ್ಕೃತಿ, ಸನ್ನಡತೆ, ಸೌಹಾರ್ದತೆಯನ್ನು ಆರಾಧಿಸುವ ಮನೋಭಾವ ನಮ್ಮದಾಗಲಿ, ಭಾರತದ ಬಹು ದೊಡ್ಡ ಪರಂಪರೆ, ವೈಶಿಷ್ಟ್ಯತೆ, ಹಾಗೂ ವೈಭವವನ್ನು ಸದಾ ಎತ್ತಿ ಹಿಡಿಯುವ ಮೂಲಕ ಮಾನವೀಯ ಮೌಲ್ಯಗಳನ್ನು ಮೈಗೂಡಿಸಿಕೊಂಡು ಮಾದರಿಯಾಗಿ ಬಾಳೋಣ ಎಂದರು.
ಸನ್ಮಾನ ಸ್ವೀಕರಿಸಿ ಮಾತನಾಡಿದ ವಲಯ ಕಸಾಪ ಅಧ್ಯಕ್ಷ ಮಡಿವಾಳಪ್ಪಗೌಡ ಪಾಟೀಲ್ ಹೆಗ್ಗನದೊಡ್ಡಿ, ಬಾಲ್ಯದಿಂದಲೇ ಮಕ್ಕಳಿಗೆ ಉತ್ತಮ ಸಂಸ್ಕಾರ ನೀಡುವಲ್ಲಿ ಪಾಲಕ ಪೋಷಕರು ಮುಂದಾಗಬೇಕು, ಇಲ್ಲದಿದ್ದರೆ ವೃದ್ಧಾಶ್ರಮಗಳ ಸಂಖ್ಯೆ ಹೆಚ್ಚುತ್ತಿರುವುದಕ್ಕೆ ಕಳವಳ ವ್ಯಕ್ತಪಡಿಸಿದವರು, ಹಿರೇಮಠ ಸಂಸ್ಥಾನದಲ್ಲಿ ಮಾಸಿಕ ಹುಣ್ಣಿಮೆಯ ಶಿವಾನುಭವ ಗೋಷ್ಠಿಯನ್ನು ಆಯೋಜಿಸಿ, ಸದ್ಭಕ್ತರಿಗೆ ಜ್ಞಾನಾಮೃತ ಉಣಬಡಿಸುತ್ತಿರುವ, ಷ ಬ್ರ ಚನ್ನಬಸವ ಶಿವಾಚಾರ್ಯರು ಕಾರ್ಯ ಅಭಿನಂದನೀಯ ಎಂದರು.
ಸಾನ್ನಿಧ್ಯ ವಹಿಸಿ ಆಶೀರ್ವಚನ ನೀಡಿದ ಚನ್ನಬಸವ ಶಿವಾಚಾರ್ಯರು ಪ್ರತಿ ವರ್ಷವೂ ತಪ್ಪದೇ ರಕ್ಷಾಬಂಧನ ಕಾರ್ಯಕ್ರಮವನ್ನು ಶ್ರೀಮಠದಲ್ಲಿ ಅಚ್ಚುಕಟ್ಟಾಗಿ ಆಯೋಜಿಸಿಕೊಂಡು ಬರುತ್ತಿರುವ ಸದ್ಭಕ್ತ ಗುಡದಯ್ಯ ದಾವಣಗೆರೆ ಹಾಗೂ ಅವರ ಗೆಳೆಯರ ಬಳಗದ ಕಾರ್ಯ ನಿಜಕ್ಕೂ ಶ್ಲಾಘನೀಯ ಎಂದು ಆಶಿಸಿದರು.
ಇದೇ ವೇಳೆ ಗುಡದಯ್ಯ ದಾವಣಗೆರೆ, ಡಾ ಅನ್ನದಾನಯ್ಯ ಹಿರೇಮಠ, ನರಸಿಂಹ ವಡ್ಡೆ, ಶ್ರೀಶೈಲ ಪಾಸೋಡಿ ದಂಪತಿಗಳನ್ನು ಅಭಿನಂದಿಸಿ ಗೌರವಿಸಲಾಯಿತು. ತದನಂತರ ವಿವೇಕ ಜಾಗೃತ ಬಳಗದ ವತಿಯಿಂದ ಸಹೋದರಿಯರು ಸಹೋದರರಿಗೆ ರಾಖಿ ಕಟ್ಟಿ, ಕಳಸ ಬೆಳಗಿ, ಸಿಹಿ ಹಂಚಿ ಸಂಭ್ರಮಿಸಿದರು.
ಶಶಿಧರ ಯಾಳಗಿ, ಸಿದ್ದಲಿಂಗ ಸ್ವಾಮಿ ಚಿಂಚೋಳಿ ಇವರಿಂದ ಸಂಗೀತ ಕಾರ್ಯಕ್ರಮ ಮೂಡಿ ಬಂತು.
ನಿಂಗನಗೌಡ ದೇಸಾಯಿ, ಮಲ್ಲನಗೌಡ ಪಾಟೀಲ, ಶಾಂತಯ್ಯ ಸ್ವಾಮಿ, ವೀರಣ್ಣ ಕಲಿಕೇರಿ, ಡಿ ಸಿ ಪಾಟೀಲ್, ಶಿವಾನಂದ ದಿಂಡವಾರ, ಮಲ್ಕಪ್ಪ ಶಹಾಪುರ, ಸೂಗುರಯ್ಯ ಇಂಡಿ, ಪರಶುರಾಮ ನಾರಾಯಣಕರ್, ಅಭಿಷೇಕ್ ಪಾಟೀಲ, ನಿಜಗುಣ ವಿಶ್ವಕರ್ಮ, ಮಹಾದೇವಪ್ಪ ವಜ್ಜಲ್, ಹಣಮಂತ ಶಹಾಪುರ, ಸೇರಿದಂತೆ ಸುತ್ತಮುತ್ತಲಿನ ಗ್ರಾಮದ ಅನೇಕ ಸದ್ಭಕ್ತರು ಉಪಸ್ಥಿತರಿದ್ದರು.
ಡಾ ಯಂಕನಗೌಡ ಪಾಟೀಲ ನಿರೂಪಿಸಿದರು. ಮೋಹನರಡ್ಡಿ ಡಿಗ್ಗಾವಿ ಸ್ವಾಗತಿಸಿದರು, ಶ್ರೀಶೈಲ ಪಾಸೋಡಿ ವಂದಿಸಿದರು.