ಉದಯರಶ್ಮಿ ದಿನಪತ್ರಿಕೆ
ಆಲಮಟ್ಟಿ: ಬಾಗಲಕೋಟೆ ಜಿಲ್ಲೆಯ ಗದ್ದನಕೇರಿ ಹಾಗೂ ಮುಚಖಂಡಿ ತಾಂಡಾದಲ್ಲಿ ಮೂರು ವರ್ಷಕ್ಕೊಮ್ಮೆ ನಡೆಯುವ ದುರ್ಗಾದೇವಿ ಜಾತ್ರೆ ಮುಗಿದ ಹಿನ್ನೆಲೆಯಲ್ಲಿ, ರಾಜ್ಯ ಹಾಗೂ ಹೊರರಾಜ್ಯಗಳಿಂದ ಆಗಮಿಸಿದ್ದ ಸಹಸ್ರಾರು ಭಕ್ತರು ಸೋಮವಾರ ಆಲಮಟ್ಟಿಯ ಕೃಷ್ಣಾ ನದಿ ತೀರದಲ್ಲಿ ಬೀಡು ಬಿಟ್ಟಿದ್ದರು.
ಜಾತ್ರೆಯಲ್ಲಿ ಕುರಿ ಬಲಿ ನೀಡಿ ಭಾನುವಾರ ಸಿದ್ಧಪಡಿಸಿದ ಅಡುಗೆಯನ್ನು ಮನೆಗೆ ಕೊಂಡೊಯ್ಯಬಾರದೆಂಬ ಸಂಪ್ರದಾಯದಂತೆ, ಭಕ್ತರು ತಮ್ಮೂರಿಗೆ ಮರಳುವ ಮುನ್ನ ಕೃಷ್ಣಾ ನದಿಯಲ್ಲಿ ಮಿಂದು, ತೀರದಲ್ಲೇ ಅಡುಗೆ ತಯಾರಿಸಿ ಸಾಮೂಹಿಕವಾಗಿ ಊಟ ಮಾಡಿದರು. ಅಲ್ಲಿಗೆ ಆಗಮಿಸಿದ ಇತರರಿಗೂ ಊಟ ಉಣಬಡಿಸಿದರು.
ಚಂದ್ರಮ್ಮ ದೇವಸ್ಥಾನದ ಬಳಿ ಹಾಗೂ ಜಲಾಶಯದ ಎಡ ಮತ್ತು ಬಲದಂಡೆಗಳಲ್ಲಿ ಸಾವಿರಾರು ಜನರು ಬಿಡಾರ ಹೂಡಿದ್ದರು. ಬಳಿಕ ಆಲಮಟ್ಟಿಯ ಉದ್ಯಾನಗಳಿಗೂ ಭೇಟಿ ನೀಡಿದ್ದರಿಂದ ಪ್ರವಾಸಿ ತಾಣಗಳು ಜನರಿಂದ ತುಂಬಿ ತುಳುಕಿದವು.
ಬಾಗಲಕೋಟೆ–ಆಲಮಟ್ಟಿ ರಸ್ತೆಯಲ್ಲಿ ಖಾಸಗಿ ವಾಹನಗಳ ಸಂಖ್ಯೆ ಹೆಚ್ಚಾಗಿ ಸಂಚಾರ ಅಸ್ತವ್ಯಸ್ತಗೊಂಡಿತು. ೪೫ ಕಿ.ಮೀ. ಪ್ರಯಾಣಕ್ಕೆ ಎರಡು ಗಂಟೆಗೂ ಹೆಚ್ಚು ಸಮಯ ಹಿಡಿದಿದ್ದರಿಂದ ಉದ್ಯೋಗಸ್ಥರು ಪರದಾಡಿದರು.
ಪಾರ್ಕಿಂಗ್ ಶುಲ್ಕ ವಸೂಲಿ ಆರೋಪ
ಆಲಮಟ್ಟಿಗೆ ಪ್ರವೇಶಿಸುವ ಪ್ರತಿ ವಾಹನದಿಂದಲೂ ಪಾರ್ಕಿಂಗ್ ಶುಲ್ಕ ವಸೂಲಿ ಮಾಡಲಾಗಿದೆ. ವಾಹನ ನಿಲುಗಡೆ ಮಾಡದಿದ್ದರೂ ೬೦೦ಕ್ಕೂ ಅಧಿಕ ವಾಹನಗಳಿಂದ ಶುಲ್ಕ ಪಡೆದಿದ್ದಾರೆ ಎಂದು ಹಲವರು ಆರೋಪಿಸಿದರು.
ಈ ಕುರಿತು ಕೆಬಿಜೆಎನ್ಎಲ್ ಅಧಿಕಾರಿಗಳಿಗೆ ಹಲವರು ತಿಳಿಸಿದರೂ ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

