ಸಾಧಕರ ಯಶಸ್ಸಿನ ಸಪ್ತ ಮೆಟ್ಟಿಲುಗಳು

ಲೇಖನ
– ಮಲ್ಲಪ್ಪ. ಸಿ. ಖೊದ್ನಾಪೂರ (ತಿಕೋಟಾ)
ವಿಜಯಪುರ

ಉದಯರಶ್ಮಿ ದಿನಪತ್ರಿಕೆ

ಆತ್ಮವಿಶ್ವಾಸವೇ ಸಾಧನೆಯ ಪ್ರಥಮ ಮೆಟ್ಟಿಲು. ನಮ್ಮ ಜೀವನದಲ್ಲಿ ಸಮಸ್ಯೆಗಳು, ತೊಂದರೆಗಳು, ಅಡ್ಡಿ-ಆತಂಕ, ಅಡಚಣೆ- ಸಂಕಷ್ಟ, ನೋವು-ನಲಿವು, ಸೋಲು-ಗೆಲುವುಗಳಿಂದ ಕೂಡಿದ್ದರೆ ಅದಕ್ಕೊಂದು ಬೆಲೆ ಮತ್ತು ಮಹತ್ವ ದೊರೆಯುತ್ತದೆ. ನಾವು ದೇವರಿಗೆ ಸದಾ ಜೀವನದಲ್ಲಿ ಯಾವುದೇ ಸಮಸ್ಯೆ-ತೊಂದರೆ, ಸಂಕಷ್ಟಗಳು ಬರದಂತೆ ನಮ್ಮ ಕಾಪಾಡು ಎಂದು ಬೇಡಿಕೊಳ್ಳುವುದಕ್ಕಿಂತ ಆ ಎಲ್ಲ ಸಮಸ್ಯೆಗಳನ್ನು ಎದುರಿಸುವ ಶಕ್ತಿಯನ್ನು ದಯಪಾಲಿಸೆಂದು ಬೇಡಿಕೊಳ್ಳಬೇಕು. ನಮ್ಮಲ್ಲಿರುವ ಶಕ್ತಿ-ಸಾಮರ್ಥ್ಯಗಳನ್ನು ಓರೆಗಲ್ಲಿಗೆ ಹಚ್ಚಲು ನನಗೊಂದು ಅವಕಾಶ ನೀಡೆಂದು ಪ್ರಾರ್ಥಿಸಬೇಕು. ಇದರಿಂದ ನಮಗೆ ಮನೋಬಲವು ಸದೃಢಗೊಂಡು ನೂರು ಆನೆ ಬಲದಷ್ಟು ಶಕ್ತಿ-ಆತ್ಮಸ್ಥೈರ್ಯ ಬರುತ್ತದೆ. ಹೀಗೆ ಆ ಎಲ್ಲ ಸಮಸ್ಯೆಗಳು ಮತ್ತು ಕೊರತೆಗಳೇ ನಮಗೆ ವರವಾಗಿ ಯಶಸ್ಸಿನ ದಡವನ್ನು ತಲುಪಲು ಸಹಕಾರಿಯಾಗುತ್ತವೆ. ಇಂದು ಬಹುತೇಕ ಜನರ ವಿಫಲತೆಗೆ ಮುಖ್ಯ ಕಾರಣವೇ ಆತ್ಮವಿಶ್ವಾಸದ ಕೊರತೆ. ನಮ್ಮಲ್ಲಿರುವ ದೌರ್ಬಲ್ಯಗಳೇ ನಮ್ಮನ್ನು ವೈಫಲ್ಯಗೊಳಿಸುತ್ತವೆ. ದೈಹಿಕವಾಗಿ ದುರ್ಬಲನಾಗಿದ್ದರೂ ಅವನಲ್ಲಿ ಆತ್ಮವಿಶ್ವಾಸವೊಂದಿದ್ದರೆ ಅವನಿಗಿಂತ ಶಕ್ತಿಶಾಲಿ ಈ ಜಗತ್ತಿನಲ್ಲಿಲ್ಲ.

ಧೈರ್ಯಂ ಸರ್ವತ್ರ ಸಾಧನಂ
ಜೀವನವೆಂದರೆ ಎಲ್ಲದಕ್ಕೂ ಎಲ್ಲರಿಗೂ ಹೆದರಿ ಬದುಕುವದಲ್ಲ. ಜೀವನವೆಂಬ ಸಾಗರವನ್ನು ದಾಟಿ ಯಶಸ್ಸೆಂಬ ದಡ ತಲುಪುವ ಸಂದರ್ಭದಲ್ಲಿ ಹತ್ತು-ಹಲವು ಸಮಸ್ಯೆಗಳು, ಅಡ್ಡಿ-ಆತಂಕ, ಅಡಚಣೆ, ತೊಂದರೆಗಳು ಎದುರಾಗಬಹುದು. ಅವೆಲ್ಲವುಗಳನ್ನು ಧೈರ್ಯದಿಂದ ಮತ್ತು ವಿಶ್ವಾಸದೊಂದಿಗೆ ಎಲ್ಲವನ್ನು ಎದುರಿಸಿ ಎಲ್ಲರ ಮಧ್ಯೆ ಛಲದಿಂದ ಬದುಕಿ ಬಾಳುವುದೇ ನಿಜವಾದ ಬದುಕು ಎನ್ನಬಹುದು. ನಮ್ಮ ಆಲೋಚನೆಗಳು ಒಳ್ಳೆಯ ಹವ್ಯಾಸಗಳಿಗೆ ಪ್ರೇರಣೆ, ಒಳ್ಳೆಯ ಹವ್ಯಾಸಗಳು ಒಳ್ಳೆಯ ಕೆಲಸಗಳಿಗೆ ಸ್ಪೂರ್ತಿ, ಮುಂದೆ ಎನನ್ನಾದರೂ ಮಾಡಬಲ್ಲೆನೆಂಬ ಧೈರ್ಯವು ಮನದಲ್ಲಿ ಉದಯಿಸಿ ಕೊನೆಗೆ ಗುರಿ ಸಾಧನೆಗೆ ದಾರಿದೀಪವಾಗುತ್ತದೆ. ಹೀಗೆ ಧೈರ್ಯವೇ ಎಲ್ಲದಕ್ಕೂ ಮೂಲವಾಗುತ್ತದೆ. ವ್ಯಕ್ತಿಯೊಬ್ಬನಲ್ಲಿ ಶಕ್ತಿ-ಸಾಮರ್ಥ್ಯ, ಜಾಣ್ಮೆ, ಪ್ರತಿಭೆ, ಬುದ್ಧಿಶಕ್ತಿ ಇಲ್ಲದಿದ್ದರೂ ಧೈರ್ಯವೊಂದಿದ್ದರೆ ಯಶ ಗಳಿಸಬಲ್ಲ.
ಗುರಿಯತ್ತ ಲಕ್ಷ್ಯ

ಖ್ಯಾತ ಆಂಗ್ಲ ಸಾಹಿತಿ ಗೋಲ್ಡ್ ಸ್ಮೀಥ್ ಹೇಳಿರುವಂತೆ “ ಕಷ್ಟಪಟ್ಟು ದುಡಿಯಬೇಕೆನ್ನುವುದು ನಿಮ್ಮ ಜೀವನದ ಮಂತ್ರವಾದರೆ, ಅದೃಷ್ಟ ನಿಮ್ಮ ಮನೆಯ ಬಾಗಿಲನ್ನು ತಟ್ಟುತ್ತದೆ” ಎನ್ನುವಂತೆ ಜೀವನದಲ್ಲಿ ನಾವು ಯಶಸ್ಸು ಗಳಿಸಬೇಕಾದರೆ ಓದುವ ಆಸಕ್ತಿ, ಒಳ್ಳೆಯ ಹವ್ಯಾಸ, ನಿರಂತರ ಅಧ್ಯಯನ, ಕಠಿಣ ಪರಿಶ್ರಮ, ಧನಾತ್ಮಕ ಚಿಂತನೆ, ಆತ್ಮವಿಶ್ವಾಸ, ದಿಟ್ಟಛಲದೊಂದಿಗೆ ಯೋಜಿತ ಹಾಗೂ ಉದಾತ್ತವಾದ ಗುರಿಯನ್ನಿಟ್ಟುಕೊಂಡು ಆ ಗುರಿಯ ಸಾಧನೆಯತ್ತ ದಿಟ್ಟ ಹೆಜ್ಜೆ ಹಾಕುತ್ತಾ ಸಾಗಿದರೆ ಯಶಸ್ಸು ಲಭಿಸುತ್ತದೆ. ಕಷ್ಟಪಡದೇ ಕೂತ ಜಾಗದಲ್ಲಿಯೇ ಯಶಸ್ಸು ಸಿಗಬೇಕೆಂದರೆ ಅದು ಕನ್ನಡಿಯೊಳಗಿನ ಗಂಟಿನಂತೆ. ನಮ್ಮ ಕೈಗೆ ಎಟುಕಲಾರದು. ಪ್ರತಿಯೊಬ್ಬರಲ್ಲಿಯೂ ವಿಶಿಷ್ಟವಾದ ಕಲೆ, ಪ್ರತಿಭೆ, ಕೌಶಲ್ಯ, ಜಾಣ್ಮೆ, ಪ್ರಾವೀಣ್ಯತೆ ಮತ್ತು ನೈಪುಣ್ಯತೆ ಇದ್ದೇ ಇರುತ್ತದೆ. ಆದರೆ ಅಂತಹ ಸುಪ್ತವಾಗಿರುವ ಪ್ರತಿಭೆ ಅರಳಲು ದೊರೆಯುವ ಅವಕಾಶಗಳನ್ನು ಸದ್ಭಳಕೆ ಮಾಡಿಕೊಳ್ಳಬೇಕು.
ಬೆಟಗೇರಿ ಕೃಷ್ಣಶರ್ಮರವರ ಹೇಳಿರುವಂತೆ,
“ಜೀವನಕ್ಕೊಂದು ಗುರಿಯಿರಲಿ, ಗುರಿಗೊಂದು ಜಯವಿರಲಿ, ಜಯಕ್ಕೊಂದು ಫಲವಿರಲಿ, ಆ ಫಲ ನಿನ್ನದಾಗಿರಲಿ..”
ಎನ್ನುವಂತೆ ಪ್ರತಿಯೊಬ್ಬರ ಜೀವನದಲ್ಲಿ ಮುಂದೆ ಒಂದು ನಿರ್ಧಿಷ್ಟ ಗುರಿ ಹಾಗೂ ಹಿಂದೆ ಒಬ್ಬ ಗುರು ಇರಬೇಕು. ಕಂಡ ಕನಸನ್ನು ಹಾಗೂ ಗುರಿಯ ಈಡೇರಿಕೆಯತ್ತ ಸಾಗಬೇಕು.
ಕಠಿಣ ಪರಿಶ್ರಮದಿಂದ ಹೋರಾಡುವ ಛಲಗಾರಿಕೆ
ನಾವು ಯಾವಾಗಲೂ ಒಳ್ಳೆಯ ಆಲೋಚನೆಯನ್ನೇ ಮಾಡಬೇಕು. ಹಿಡಿದ ಕಾರ್ಯವನ್ನು ನೆರವೇರಿಸುವತ್ತ ನಮ್ಮ ದೃಷ್ಟಿಯನ್ನು ಕೇಂದ್ರೀಕರಿಸಬೇಕು. ಕೆಲವೊಮ್ಮೆ ಕೈಕೊಂಡ ಕಾರ್ಯದಲ್ಲಿ ಸಮಸ್ಯೆಗಳು ಬಂದಾಗ ನಾವು ಸೋತಿರಬಹುದು ನಿಜ. ಸೋತಾಗ ಜನ ಏನು ಅಂದಾರು? ಏನು ಅಂದುಕೊಳ್ಳುತ್ತಾರೆ? ಅಥವಾ ಅಪಹಾಸ್ಯ, ಟೀಕೆ, ಹಿಯಾಳಿಕೆ, ತೆಗಳಿಕೆಗಳಂತಹ ಸನ್ನಿವೇಶಗಳು ಬಂದಾಗ ಕಿಂಚಿತ್ತೂ ಧೃತಿಗೆಡದೇ, ಅಧೈರ್ಯಗೊಳ್ಳದೇ ಆ ಸೋಲಿನಿಂದ ಕಲಿತ ಪಾಠ-ಅನುಭವಗಳಿಂದ ಎಚ್ಚೆತ್ತುಕೊಂಡು ಮುಂದೆ ಎಚ್ಚರಿಕೆಯ ನಡೆಯಿಟ್ಟು ಸಾಗಿದಾಗ ಖಂಡಿತವಾಗಿಯೂ ಜಯವೆಂಬುದು ದೊರೆಯುತ್ತದೆ. ಅದಕ್ಕಂತಲೇ ಡಾ. ಎ.ಪಿ.ಜೆ. ಅಬ್ದುಲ್ ಕಲಾಂ ರವರು “ಸೋಲಿನಿಂದ ಕಲಿತ ಪಾಠ-ಅನುಭವವೇ ಜಗತ್ತಿನ ಸರ್ವಶ್ರೇಷ್ಠ ಶಿಕ್ಷಕ. ನೀವು ಉಸಿರಾಡುವವರೆಗೂ ಕಲಿಕೆ ಮತ್ತು ಜ್ಞಾನಾರ್ಜನೆಯೇ ನಿಮ್ಮ ಜೀವನದ ಗುರಿಯಾಗಲಿ” ಎಂದು ಹೇಳಿದ್ದಾರೆ.
ಕಾರ್ಯನಿಷ್ಠೆಯಿಂದ ಕೆಲಸ ಮಾಡುವ ಹಂಬಲ ಸಾಧನೆಯ ಪಯಣದ ಹಾದಿ
ಸಾಧನೆಯ ಪಯಣದ ಮೊದಲ ಹೆಜ್ಜೆಯಲ್ಲಿ ಯಾರೂ ಗುರಿ ತಲುಪಲು ಸಾಧ್ಯವಿಲ್ಲ. É ಮೆಟ್ಟಿಲು ಮೇಲೆ ಹೆಜ್ಜೆಯಿರಿಸಿದೊಡನೆ ಮಹಡಿ ತಲುಪಲು ಸಾಧ್ಯವಿಲ್ಲ. ನಿರಂತರ ಅಧ್ಯಯನ, ಕಠಿಣ ಪರಿಶ್ರಮದೊಂದಿಗೆ ಒಂದೊಂದೇ ಮೆಟ್ಟಿಲನ್ನು ಏರುತ್ತಾ ಹೋದರೆ ನಮಗೆ ಗಮ್ಯ ದೊರೆಯುವುದು ಮತ್ತು ಪ್ರತಿ ಹೆಜ್ಜೆಯ ಪಯಣವು ಗುರಿಗೆ ಹತ್ತಿರವಾಗಿಸುತ್ತದೆ. ಕೆಲವು ಸಾಧನೆಗಳಿಗಂತೂ ಎಷ್ಟೋ ವರ್ಷಗಳ ನಿರಂತರ ಪರಿಶ್ರಮ, ಪ್ರಯತ್ನ ಬೇಕೇ ಬೇಕು. ಖ್ಯಾತ ಉದ್ಯಮಿ ಹಾಗೂ ವಿಪ್ರೋ ಸಂಸ್ಥೆಯ ಅಧ್ಯಕ್ಷರಾದ ಅಜೀಂ ಪ್ರೇಮಜಿ ಅವರ ಅನುಭವದ ಪ್ರಕಾರ “ಯಶಸ್ಸು ಸಿಗುವುದು ಅಪರೂಪ. ಅಂತಹ ಅಪರೂಪದ ಸಾಧನೆ ಮಾಡಿದವರಿಗೆ ಮಾತ್ರ ಯಶಸ್ಸು ಮನೆಯ ದೀಪ. ಸತತ ಪ್ರಯತ್ನ, ದಿಟ್ಟ ಛಲ ಹಾಗೂ ಆತ್ಮವಿಶ್ವಾಸಗಳೆಂಬ ಮೂರು ಸೂತ್ರಗಳಿಂದ ಯಶಸ್ಸಿನ ದೇಗುಲದ ಮೆಟ್ಟಿಲುಗಳನ್ನು ಏರಲು ಸಾಧ್ಯ” ಎಂದು ಹೇಳುತ್ತಾರೆ.
ಅದೃಷ್ಟ ನಂಬಿ ಕೂಡದೇ ಪ್ರಯತ್ನಶೀಲರಾಗಿ: ಡಿ.ವ್ಹಿ.ಜಿ ಅವರು ಹೇಳಿರುವಂತೆ “ ಇನ್ನೇನು ಮತ್ತೇನು ಗತಿಯೆಂದು ಬೆದರದಿರು, ನಿನ್ನ ಕೈಯೊಳಗಿಹುದೇ ವಿಧಿಯ ಲೆಕ್ಕಣಿಕೆ, ಕಣ್ಣಿಗೆಟುಕದೆ ಸಾಗುತಿಹುದು ದೈವದ ಸಂಚು, ತಣ್ಣಗಿರಿಸಾತ್ಮವನು ಮಂಕುತಿಮ್ಮ” ಎಂಬ ನುಡಿಯಂತೆ ಯಶಸ್ಸು ಮತ್ತು ಅದೃಷ್ಟಕ್ಕೂ ಯಾವುದೇ ರೀತಿಯ ಸಂಬಂಧವಿಲ್ಲ. ನಮ್ಮ ಕಾರ್ಯಸಾಧನೆಗೆ ಅಥವಾ ಯಶಸ್ಸು ಪಡೆಯಲು ಹಣೆಬರಹ, ಅದೃಷ್ಟವೆಂಬುದು ಖಂಡಿತ ಇಲ್ಲ. ಜಗತ್ತಿನಲ್ಲಿ ಮಹಾನ್ ಸಾಧನಗೈದ ಮಹಾಪುರುಷರೆಲ್ಲರೂ ನಮ್ಮಂತೆ ಮನುಷ್ಯರೇ. ಅವರಲ್ಲಿ ಕಲಿಯುವ, ಕನಸನ್ನು ನನಸು ಮಾಡುವ, ಕೊರತೆಗಳನ್ನೇ ವರದಾನವಾಗಿಸಿಕೊಳ್ಳುವ, ಶ್ರದ್ದೆಯಿಂದ ದುಡಿಯುವ, ಸದಾ ಸಕಾರಾತ್ಮಕವಾಗಿ ಚಿಂತಿಸುವ ಮತ್ತು ಹಿಡಿದ ಕಾರ್ಯವ ಬಿಡದಿರುವ ದಿಟ್ಟಛಲವೇ ಅವರ ಯಶಸ್ಸಿನ ಗುಟ್ಟು. ನೀವು ಎಂದಿಗೂ ನಿಮ್ಮ ಬಗ್ಗೆ, ನಿಮ್ಮನ್ನು ಕೀಳಾಗಿ ಕಾಣದೇ ಸದೃಢ ಮನೋಬಲ ಮತ್ತು ಆತ್ಮವಿಶ್ವಾಸದೊಂದಿಗೆ ಮುನ್ನುಗ್ಗಿದರೆ ಸಾಧನೆಯೇನು ಗಗನ ಕುಸುಮವೇನಲ್ಲ ಹಾಗೂ ಯಶಸ್ಸು ನಿಮ್ಮ ಮನೆಯ ಬಾಗಿಲಿಗೆ ಬರುವುದರಲ್ಲಿ ಎರಡು ಮಾತಿಲ್ಲ.
ಧನಾತ್ಮಕ ಚಿಂತನೆ ಇರಲಿ
ಜೀವನದಲ್ಲಿ ಯಾವುದೇ ಕೆಲಸ-ಕಾರ್ಯಗಳನ್ನು ಕೈಗೊಳ್ಳುವಾಗ ಅಥವಾ ಕಾರ್ಯಸಾಧನೆ ಪಥದಲ್ಲಿ ಎಂತಹ ಸಮಸ್ಯೆ, ತೊಂದರೆ, ಸನ್ನಿವೇಶ ಅಥವಾ ಸಂದರ್ಭಗಳೇ ಎದುರಾಗಲಿ, ಅವು ಎಷ್ಟೇ ಕಠಿಣವಾಗಿರಲಿ. ಅದಕ್ಕೆ ನಮ್ಮಲ್ಲಿ ಮೊದಲ ಉತ್ತರ ಅದು ನನ್ನಿಂದ ಮಾತ್ರ ಸಾಧ್ಯ, ನಾನು ಎದುರಿಸಬಲ್ಲೆ, ಪರಿಹರಿಸಬಲ್ಲೆ ಮತ್ತು ನಾನು ಸಮರ್ಥ ಎಂಬಂತಹ ಧನಾತ್ಮಕ ಆಲೋಚನೆಗಳೇ ನಮ್ಮಲ್ಲಿ ನೂರಕ್ಕೆ ನೂರರಷ್ಟು ಆ ಸಮಸ್ಯೆಯನ್ನು ಒಂದು ಸವಾಲನ್ನಾಗಿ ಸ್ವೀಕರಿಸುವ ಮನೋಭಾವ ಒಡಮೂಡಿ ಎದುರಿಸಬಲ್ಲೆನೆಂಬ ದೃಢವಾದ ನಂಬಿಕೆ ಮತ್ತು ಆತ್ಮಸ್ಥೈರ್ಯವನ್ನು ಹುಟ್ಟಿಸುತ್ತವೆ. ನಾವು ಕೈಗೆತ್ತಿಕೊಳ್ಳುವ ಪ್ರತಿಯೊಂದು ಕಾಯಕ ಅಥವಾ ಕೆಲಸದ ಬಗ್ಗೆ ಅನುಮಾನ, ಭಯ, ಅಂಜಿಕೆ ಮತ್ತು ಮಾನಸಿಕ ತುಮುಲ ಹಾಗೂ ಗೊಂದಲಗಳು ಇರಬಾರದು.
ಕೊನೆಯ ನುಡಿ
ಸ್ವಾಮಿ ವಿವೇಕನಂದರ ವಾಣಿಯಂತೆ, “ಜೀವನದಲ್ಲಿ ಶ್ರದ್ಧೆ, ಸಹನೆ ಮತ್ತು ಸತತ ಪ್ರಯತ್ನ ಇವು ಜಯಶಾಲಿಯಾಗಲು ಬೇಕಾದ ಮೂರು ಸಾಧನಗಳು ಇದರ ಜೊತೆಗೆ ಆತ್ಮವಿಶ್ವಾಸವಿದ್ದರೆ ಮಾತ್ರ ವಿಜಯಲಕ್ಷ್ಮಿ ಒಲಿಯುತ್ತಾಳೆ” ಎಂದು ಹೇಳಿದ್ದಾರೆ. ಯಶಸ್ಸು ಮತ್ತು ಅದೃಷ್ಟಕ್ಕೂ ಯಾವುದೇ ರೀತಿಯ ಸಂಬಂಧವಿಲ್ಲ. ನಿಮ್ಮನ್ನು ಕೀಳಾಗಿ ಕಾಣದೇ ಸದೃಢ ಮನೋಬಲ ಮತ್ತು ಆತ್ಮವಿಶ್ವಾಸದೊಂದಿಗೆ ಮುನ್ನುಗ್ಗಿದರೆ ಸಾಧನೆಯೇನು ಗಗನ ಕುಸುಮವೇನಲ್ಲ ಹಾಗೂ ಯಶಸ್ಸು ನಿಮ್ಮ ಮನೆಯ ಬಾಗಿಲಿಗೆ ಬರುವುದರಲ್ಲಿ ಎರಡು ಮಾತಿಲ್ಲ. ನನ್ನಲ್ಲಿರುವ ಶಕ್ತಿ-ಸಾಮರ್ಥ್ಯ, ಕಲೆ, ಜ್ಞಾನ, ಪ್ರತಿಭೆ, ಜಾಣ್ಮೆ, ನೈಪುಣ್ಯತೆ, ಕೌಶಲ್ಯ ಮತ್ತು ಕ್ರೀಯಾಶೀಲತೆಗಳ ಬಗ್ಗೆ ಸ್ಪಷ್ಟವಾಗಿ ಅರಿತುಕೊಳ್ಳಬೇಕು. ಹಾಕಿಕೊಂಡ ಗುರಿ ಮತ್ತು ಧ್ಯೇಯದ ಈಡೇರಿಕೆಯತ್ತ ಲಕ್ಷ್ಯವಿಟ್ಟು ನಿರಂತರ ಅಧ್ಯಯನ, ಪರಿಶ್ರಮ, ನಿಷ್ಠೆ, ಕಾರ್ಯಶ್ರದ್ಧೆ, ಸಕಾರಾತ್ಮಕ ಚಿಂತನೆ ಮತ್ತು ಆತ್ಮವಿಶ್ವಾಸದೊಂದಿಗೆ ಮುಂದಡಿಯಿಟ್ಟರೆ ಜಯ ನಮ್ಮದಾಗುತ್ತದೆ.