ಉದಯರಶ್ಮಿ ದಿನಪತ್ರಿಕೆ
ವಿಜಯಪುರ: ನೀಟ್ ಪಾಸಾಗಿ ಸರಕಾರಿ ಕೋಟಾದಡಿ ಎಂ.ಬಿ.ಬಿ.ಎಸ್. ಸೀಟು ಪಡೆದಿದ್ದರೂ ಶುಲ್ಕ ಭರಿಸಲಾಗದೆ ಆರ್ಥಿಕ ಸಮಸ್ಯೆ ಎದುರಿಸುತ್ತಿದ್ದ ಇಬ್ಬರು ಇಬ್ಬರು ಬಡ ಮತ್ತು ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಹಣಕಾಸಿನ ನೆರವು ನೀಡುವ ಮೂಲಕ ಬೃಹತ್ ಮತ್ತು ಮಧ್ಯಮ ಕೈಗಾರಿಕೆ, ಮೂಲಸೌಲಭ್ಯ ಅಭಿವೃದ್ಧಿ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಎಂ. ಬಿ. ಪಾಟೀಲ ಸಹಾಯ ಹಸ್ತ ಚಾಚಿದ್ದಾರೆ.
ಸೋಮವಾರ ವಿಜಯಪುರದಲ್ಲಿರುವ ಗೃಹ ಕಚೇರಿಗೆ ಆಗಮಿಸಿದ ಬಬಲೇಶ್ವರ ತಾಲೂಕಿನ ಕಾಖಂಡಕಿ ಗ್ರಾಮದ ವಿದ್ಯಾರ್ಥಿ ಶ್ರೀಧರ ಬಸವರಾಜ ಕಲ್ಯಾಣಿ ಮತ್ತು ತಿಕೋಟಾ ತಾಲೂಕಿನ ಬಿಜ್ಜರಗಿ ಗ್ರಾಮದ ವಿದ್ಯಾರ್ಥಿ ಯಮನಪ್ಪ ಕಾಡಪ್ಪ ಮಾದರ ಅವರಿಗೆ ಸಚಿವರು ಎಂ. ಬಿ. ಬಿ. ಎಸ್. ಕೋರ್ಸಿನ ಮೊದಲ ವರ್ಷದ ಬೋಧನಾ ಶುಲ್ಕ, ಹಾಸ್ಟೆಲ್ ಶುಲ್ಕ ಮತ್ತು ಊಟದ ಶುಲ್ಕಕ್ಕೆ ಅಗತ್ಯವಾಗಿರುವ ರೂ. 1,29,400 (ಒಂದು ಲಕ್ಷದ 29 ಸಾವಿರದ 400 ರೂಪಾಯಿ) ಹಣದ ಚೆಕ್ ವಿತರಿಸಿದರು.
ಈ ಸಂದರ್ಭದಲ್ಲಿ ಬಿ.ಎಲ್.ಡಿ.ಇ ಸಂಸ್ಥೆಯ ಮುಖ್ಯ ಸಲಹೆಗಾರ ಮತ್ತು ಡೀಮ್ಡ್ ವಿಶ್ವವಿದ್ಯಾಲಯದ ರಜಿಸ್ಟ್ರಾರ್ ಡಾ. ಆರ್. ವಿ ಕುಲಕರ್ಣಿ, ವಿದ್ಯಾರ್ಥಿ ಶ್ರೀಧರ ಬಸವರಾಜ ಕಲ್ಯಾಣಿ ಅವರ ತಾಯಿ ಕಲಾವತಿ ಉಪಸ್ಥಿತರಿದ್ದರು.
ಎಂ.ಬಿ.ಬಿ.ಎಸ್ ಕೋರ್ಸಿಗೆ ಬೋಧನೆ, ಹಾಸ್ಟೇಲ್ ಮತ್ತು ಊಟದ ಖರ್ಚು ಸೇರಿ ಒಟ್ಟು ರೂ. 517600(ಐದು ಲಕ್ಷ 17 ಸಾವಿರದ 600 ರೂಪಾಯಿ) ವೆಚ್ಚ ತಗುಲಲಿದ್ದು, ಈ ಎಲ್ಲ ಹಣವನ್ನು ಸಚಿವರು ಬಿ.ಎಲ್.ಡಿ.ಇ ಸಂಸ್ಥೆಯಿಂದ ಭರಿಸಲಿದ್ದಾರೆ. ಅಲ್ಲದೇ, ಇದರ ಮೊದಲ ಕಂತಿನ ಹಣದ ಚೆಕ್ ನ್ನು ಇಂದು ವಿತರಿಸಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ವಿದ್ಯಾರ್ಥಿ ಶ್ರೀಧರ ಬಸವರಾಜ ಕಲ್ಯಾಣಿ, ನೀಟ್ ನಲ್ಲಿ ನನಗೆ 36400 ಸ್ಥಾನ ಬಂದಿದ್ದು, ಕಲಬುರಗಿ ಜಿಮ್ಸ್ ಕಾಲೇಜ್ ಸರಕಾರಿ ಕೋಟಾದಡಿ ಎಂ.ಬಿ.ಬಿ.ಎಸ್ ಸೀಟು ಸಿಕ್ಕಿದೆ. ಪ್ರವೇಶ ಶುಲ್ಕ ಭರಿಸಲು ಪರದಾಡುತ್ತಿದ್ದ ನಮಗೆ ಸಚಿವ ಎಂ. ಬಿ. ಪಾಟೀಲ ಅವರು ಆಪದ್ಬಾಂಧವರಾಗಿದ್ದಾರೆ. ನಮಗೆ ಸಹಾಯ ಮಾಡುವ ಮೂಲಕ ನಮ್ಮ ಸಂಕಷ್ಟಕ್ಕೆ ಸ್ಪಂದಿಸಿದ್ದಾರೆ. ಮುಂದೆ ಎಂ.ಡಿ ಓದಿ ವಿಜಯಪುರದಲ್ಲಿಯೇ ಎಂ. ಬಿ. ಪಾಟೀಲ ಅವರ ಹೆಸರಿನಲ್ಲಿ ಆಸ್ಪತ್ರೆ ಪ್ರಾರಂಭಿಸಿ ಬಡಜನರ ಸೇವೆ ಮಾಡುತ್ತೇನೆ ಎಂದು ತಿಳಿಸಿದರು.
ಶ್ರೀಧರ ಬಸವರಾಜ ಕಲ್ಯಾಣಿ ತಾಯಿ ಕಲಾವತಿ ಮಾತನಾಡಿ, ನಮಗೆ ಎರಡು ಎಕರೆ ಜಮೀನಿದ್ದು, ನನ್ನ ಪತಿಗೆ ಆರೋಗ್ಯ ಸರಿಯಿಲ್ಲ. ನಮಗೆ ಶ್ರೀಧರ, ವೈಭವ ಮತ್ತು ಪ್ರದೀಪ ಮೂರು ಜನ ಮಕ್ಕಳಿದ್ದಾರೆ. ಕಿರಿಯರಿಬ್ಬರೂ ಪಿಯುಸಿ ಓದುತ್ತಿದ್ದ, ಹಿರಿಯ ಮಗ ಶ್ರೀಧರ 10ನೇ ತರಗತಿಯವರೆಗೆ ಕಾಖಂಡಕಿ ಸರಕಾರಿ ಶಾಲೆಯಲ್ಲಿಯೇ ಓದಿದ್ದಾನೆ. ವಿಜಯಪುರದ ತುಂಗಳ ಕಾಲೇಜಿನಲ್ಲಿ ಪಿಯುಸಿ ಓದಿರುವ ಈತನಿಗೆ ಮೆಡಿಕಲ್ ಸೀಟು ಸಿಕ್ಕಿದೆ. ಆದರೆ, ಮನೆಯ ಪರಿಸ್ಥಿತಿ ನಾಜೂಕಾಗಿರುವ ಕಾರಣ ಹಣವಿಲ್ಲದ ಕಾರಣ ವೈದ್ಯನಾಗಬೇಕೆಂಬ ಮಗನ ಕನಸು ನನಸಾಗದೇ ದಿಕ್ಕು ತೋಚದಂತಾಗಿದ್ದೆವು. ಆಗ ಸಚಿವ ಎಂ. ಬಿ. ಪಾಟೀಲ ಅವರನ್ನು ಬಂದು ಭೇಟಿ ಮಾಡಿದಾಗ ಸಹಾಯ ಹಸ್ತ ಚಾಚಿದ್ದಾರೆ. ನಮಗೆ ಬಹಳ ಹೌಸ(ಸಂತೋಷ) ಆಗಿದೆ. ದೇವರು ಶಿವನ ರೂಪದಲ್ಲಿ ಬಂದು ನೆರವಾಗಿರುವ ಎಂ. ಬಿ. ಪಾಟೀಲರಿಗೆ ನಾವು ಜೀವನಪೂರ್ತಿ ಋಣಿಯಾಗಿರುತ್ತೇವೆ. ಕೊಡುಗೈ ದಾನಿಯಾಗಿರುವ ಅವರಿಗೆ ದೇವರು ಇನ್ನೂ ಹೆಚ್ಚಿನ ಆಶೀರ್ವಾದ ಮಾಡಿ ಉನ್ನತ ಸ್ಥಾನಕ್ಕೇರಿಸಲಿ ಎಂದು ಮನದಾಳದಿಂದ ಆಶೀರ್ವದಿಸಿದರು.
ಮತ್ತೋರ್ವ ವಿದ್ಯಾರ್ಥಿ ಯಮನಪ್ಪ ಕಾಡಪ್ಪ ಮಾದರ ಮಾತನಾಡಿ, ನನಗೆ ತಂದೆ ಇಲ್ಲ. ತಾಯಿ ಕೂಲಿ ಕೆಲಸ ಮಾಡುತ್ತಾಳೆ. ಮೂರು ಜನ ಅಕ್ಕಂದಿರು ಮದುವೆಯಾಗಿ ಪತಿ ಮನೆಯಲ್ಲಿ ವಾಸವಾಗಿದ್ದಾರೆ. ನೀಟ್ ಪರೀಕ್ಷೆಯಲ್ಲಿ ನನಗೆ 187253 ಸ್ಥಾನ ಬಂದಿದೆ. ಆದರೆ, ಬಡತನದ ಹಿನ್ನೆಲೆಯಲ್ಲಿ ನೀಟ್ ಪಾಸಾದರೂ ಎಂ.ಬಿ.ಬಿ.ಎಸ್ ಪ್ರವೇಶ ಪಡೆಯಲು ಸಂಕಷ್ಟ ಪಡುತ್ತಿದ್ದ ನನಗೆ ಎಂ. ಬಿ. ಪಾಟೀಲರು ದೇವರ ರೂಪದಲ್ಲಿ ಬಂದು ನೆರವಾಗಿದ್ದಾರೆ. ಅವರಿಗೆ ನಾನು ಮತ್ತು ನನ್ನ ತಾಯಿ ಸದಾ ಋಣಿಯಾಗಿರುತ್ತೇವೆ. ಭವಿಷ್ಯದಲ್ಲಿ ಉತ್ತಮ ವೈದ್ಯನಾಗಿ ವಿಜಯಪುರದಲ್ಲಿಯೇ ಬಡಜನರ ಸೇವೆ ಮಾಡುವ ಮಹದಾಸೆ ಇದೆ ಎಂದು ಹೇಳಿದರು.
ನಾನು 1 ರಿಂದ 6ನೇ ತರಗತಿಯವರೆಗೆ ಮದಭಾವಿ ಸರಕಾರಿ ಶಾಲೆಯಲ್ಲಿ ಓದಿದ್ದೇನೆ. ಮಲ್ಲಾಬಾದಿನಲ್ಲಿ ಹಾಸ್ಟೇಲಿನಲ್ಲಿದ್ದುಕೊಂಡು 7ನೇ ತರಗತಿ ಮುಗಿಸಿದ್ದೇನೆ. ನಂತರ 8 ರಿಂದ 10ನೇ ತರಗತಿಯವರೆಗೆ ಬಿಜ್ಜರಗಿ ಸರಕಾರಿ ಶಾಲೆಯಲ್ಲಿ ಓದಿದ್ದೇನೆ. ವಿಜಯಪುರ ನಗರದಲ್ಲಿರುವ ಸರಕಾರಿ ಬಾಲಕರ ಪದವಿಪೂರ್ವ ಕಾಲೇಜಿನಲ್ಲಿ ಪಿಯುಸಿ ಓದಿದ್ದೇನೆ. ಈಗ ಹಾವೇರಿಯ ಸರಕಾರಿ ವೈದ್ಯಕೀಯ ಕಾಲೇಜಿನಲ್ಲಿ ಎಂ.ಬಿ.ಬಿ.ಎಸ್. ಸೀಟು ಸಿಕ್ಕಿದ್ದು, ಸಚಿವರ ಸಹಾಯದಿಂದ ತುಂಬಾ ಸಂತಸವಾಗಿದೆ ಎಂದು ಯಮನಪ್ಪ ಕಾಡಪ್ಪ ಮಾದರ ಹರ್ಷ ವ್ಯಕ್ತಪಡಿಸಿದರು.
