ಚಡಚಣದ ಡಾ.ರಾಜಕುಮಾರ್ ವೃತ್ತದಲ್ಲಿ ಪುನೀತ್ ರಾಜಕುಮಾರ್ ಅವರ ಐದನೇ ಪುಣ್ಯಸ್ಮರಣೆ
ಉದಯರಶ್ಮಿ ದಿನಪತ್ರಿಕೆ
ಚಡಚಣ: ಕನ್ನಡ ಚಿತ್ರರಂಗದ ಮೇರು ನಟ, ಕರ್ನಾಟಕ ರತ್ನ ಡಾ. ಪುನೀತ್ ರಾಜಕುಮಾರ್ ಅವರ ಐದನೇ ಪುಣ್ಯಸ್ಮರಣೆಯನ್ನು ವಿಶ್ವಮಾನವ ಡಾ. ರಾಜಕುಮಾರ್ ಫೌಂಡೇಶನ್ ಚಡಚಣ ಶಾಖೆ ವತಿಯಿಂದ ಪಟ್ಟಣದಲ್ಲಿ ಭಾವಪೂರ್ಣವಾಗಿ ಆಚರಿಸಲಾಯಿತು.
ಪಟ್ಟಣದ ಡಾ. ರಾಜಕುಮಾರ್ ವೃತ್ತದ (ಎಸ್‌ಬಿಐ ಬ್ಯಾಂಕ್ ಸಮೀಪ)ದಲ್ಲಿ ಪುನೀತ್ ರಾಜಕುಮಾರ್ ಅವರ ಭಾವಚಿತ್ರಕ್ಕೆ ದೇವೇಂದ್ರಪ್ಪ ಪಾಟೀಲ ಹಾಗೂ ಸಂಘದ ಅಧ್ಯಕ್ಷ ಶಿವರಾಜ್ ಪಾತ್ರೋಟ್ ಅವರು ಪೂಜೆ ಸಲ್ಲಿಸಿ ಗೌರವ ನಮನ ಅರ್ಪಿಸಿದರು.
ಈ ಸಂದರ್ಭದಲ್ಲಿ ಸಂಘದ ಕಾರ್ಯದರ್ಶಿ ಶ್ರೀಧರ ಯಂಕಂಚಿ ಮತ್ತು ಸಂಘದ ಉಪಾಧ್ಯಕ್ಷ ಉದಯಕುಮಾರ ಅವಟಿ ಮಾತನಾಡಿ, ಪುನೀತ್ ರಾಜಕುಮಾರ್ ಅವರು ಬಾಲನಟನಾಗಿ ಚಿತ್ರರಂಗ ಪ್ರವೇಶಿಸಿ, ತಮ್ಮ ಪ್ರತಿಭೆ, ಪರಿಶ್ರಮ ಹಾಗೂ ಸರಳ ವ್ಯಕ್ತಿತ್ವದ ಮೂಲಕ ಕನ್ನಡಿಗರ ಮನದಲ್ಲಿ ಅಚ್ಚಳಿಯದ ಸ್ಥಾನ ಪಡೆದಿದ್ದಾರೆ. ಅವರ ಸಾಧನೆ ಹಾಗೂ ನಡೆದು ಬಂದ ಹಾದಿ ಪ್ರತಿಯೊಬ್ಬರಿಗೂ ಮಾದರಿಯಾಗಿದೆ. ಅವರ ಬದುಕಿನ ಆದರ್ಶಗಳನ್ನು ಯುವಕರು ತಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು ಎಂದು ಸಲಹೆ ನೀಡಿದರು.
ಈ ಸಂದರ್ಭದಲ್ಲಿ ಸಂಘದ ಸದಸ್ಯರಾದ ಪರಶುರಾಮ ಬನಸೋಡೆ, ವಿಶ್ವನಾಥ ಪಾಟೀಲ, ರವೀಂದ್ರ ಅವಜಿ, ಬಾಲಾಜಿ ಗಾಡಿ, ವಡ್ಡರ ಭೀಮಾಶಂಕರ ಅಲಕುಂಟೆ, ವಿಜಯಕುಮಾರ ಅವಟಿ, ರವಿ ಉಮರಾಣಿ, ದುರ್ಗಪ್ಪ ಕೊರವರ, ಮೀರಾಸಾಬ್ ಬರಡೋಲ, ರವಿ ತೆಲಸಂಗ, ರಾಘವೇಂದ್ರ ಪಾತ್ರೋಟ್, ಪುನೀತ್ ರಾಜ್ ಪಾತ್ರೋಟ್, ವಿನಯರಾಜ ಪಾತ್ರೋಟ್, ಗುರುರಾಜ ಪಾತ್ರೋಟ್ ಸೇರಿದಂತೆ ಅನೇಕರು ಭಾಗವಹಿಸಿದ್ದರು.
