ಲೇಖನ:
– ಸಂತೋಷ್ ರಾವ್ ಪೆರ್ಮುಡ
ಪೆರ್ಮುಡ ಮನೆ
ಪಟ್ರಮೆ ಗ್ರಾಮ ಮತ್ತು ಅಂಚೆ
ಬೆಳ್ತಂಗಡಿ ತಾಲೂಕು,
ದ.ಕ ಜಿಲ್ಲೆ-574198
ದೂ: 9742884160
ಉದಯರಶ್ಮಿ ದಿನಪತ್ರಿಕೆ
‘ಸ್ತ್ರೀ’ ಎಂದರೆ ಅಷ್ಟೇ ಸಾಕೆ? ಆಕೆ ಮನೆಯ ಮಗಳಾಗಿ, ಒಡತಿಯಾಗಿ, ಗರತಿ. ತಾಯಾಗಿ, ತಂಗಿಯಾಗಿ, ಮಡದಿಯಾಗಿ, ಅಕ್ಕನಾಗಿ ಗಂಡು ಹೆಣ್ಣೆಂಬ ಬೇಧವಿಲ್ಲದೇ ಎಲ್ಲರನ್ನೂ ಸಲಹುತ್ತಾಳೆ. ಇಂತಹ ಶಕ್ತಿಯನ್ನು ಕೇವಲ ‘ಸ್ತ್ರೀ’ ಎಂದು ಕರೆದರಷ್ಟೇ ಸಾಲದು. ಒಂದು ಮನೆಯ ಮಗಳಾಗಿ ಹುಟ್ಟಿ, ಮತ್ತೊಂದು ಮನೆಯನ್ನು ಸೊಸೆಯಾಗಿ ಬೆಳಗುತ್ತಾಳೆ. ತನ್ನೊಡಲಲ್ಲಿ ಒಂದು ಹೊಸ ಜೀವಕ್ಕೆ ಉಸಿರು ನೀಡಿ ಜೀವವಾಗುವವಳು. ಬದುಕಿಡೀ ತನ್ನನು ತಾನು ಗಂಧದಂತೆ ತೇಯುವಳು, ದೀಪದಂತೆ ಉರಿಯುವಳು. ಅವಳು ಬರೀ ಹೆಣ್ಣಲ್ಲ, ಜಗತ್ತಿಗೆ ಕಣ್ಣು. ಅನುದಿನವೂ ಕುಟುಂಬಕ್ಕಾಗಿ ದುಡಿಯುವ ಅವಳಿಗಾಗಿ ವರ್ಷದ ಒಂದು ದಿನವನ್ನು ಮುಡಿಪಾಗಿಡಬೇಕು.
ಮಾರ್ಚ್ 8ನ್ನು ಮಹಿಳಾ ದಿನಾಚರಣೆಯಾಗಿದ್ದು, ಅಂದು ಮಹಿಳೆಯರ ಸಾಧನೆಯನ್ನು ಗೌರವಿಸುವುದರೊಂದಿಗೆ ಲಿಂಗ ಸಮಾನತೆಯ ಜಾಗೃತಿ ಮೂಡಿಸಲಾಗುತ್ತದೆ. ವಿವಿಧ ಕ್ಷೇತ್ರಗಳಲ್ಲಿ ಸಾಧನೆಗೈದಿರುವ ಮಹಿಳೆಯರ ಸಾಧನೆಯನ್ನು ನೆನೆಯಲಾಗುತ್ತದೆ. 1908ರಲ್ಲಿ ಅಮೆರಿಕದ ನ್ಯೂಯಾರ್ಕಿನಲ್ಲಿ ಸಾವಿರಾರು ಮಹಿಳೆಯರು ಉತ್ತಮ ವೇತನ, ಕಡಿಮೆ ಕೆಲಸದ ಸಮಯ ಮತ್ತು ಮತದಾನದ ಹಕ್ಕಿಗಾಗಿ ಮೆರವಣಿಗೆ ನಡೆಸಿದರು. 1910ರಲ್ಲಿ ಡೆನ್ಮಾರ್ಕಿನ ಕೋಪನ್’ಹೇಗಿನ ಮಹಿಳಾ ಸಮ್ಮೇಳನದಲ್ಲಿ ಅಂತರರಾಷ್ಟ್ರೀಯ ಮಹಿಳಾ ದಿನಾಚರಣೆ ಆಚರಿಸುವಂತೆ ಚರ್ಚಿಸಲಾಯಿತು. 1917ರಲ್ಲಿ ರಷ್ಯಾದಲ್ಲಿ ಮಹಿಳೆಯರು ‘ಬ್ರೆಡ್ ಮತ್ತು ಶಾಂತಿ’ಗಾಗಿ ನಡೆಸಿದ ಪ್ರತಿಭಟನೆಯೂ ಮಹಿಳಾ ದಿನಾಚರಣೆಯ ಇತಿಹಾಸದಲ್ಲಿ ಮಹತ್ವದ ಮೈಲಿಗಲ್ಲಾಗಿದೆ.
ಇಂದು ಮಹಿಳೆಯರು ಸಾಂಪ್ರದಾಯಿಕ ಚೌಕಟ್ಟುಗಳನ್ನು ಮೀರಿ ಅಡುಗೆಮನೆಯಿಂದ ಬಾಹ್ಯಾಕಾಶದವರೆಗೆ ಅವರ ಸಾಧನೆಯ ಕ್ಷಿತಿಜ ವಿಸ್ತರಿಸಿದೆ. ಇಸ್ರೋದ ಮಂಗಳಯಾನ, ಚಂದ್ರಯಾನದಂತಹ ಜಟಿಲ ಯೋಜನೆಗಳಲ್ಲಿ ಮಹಿಳಾ ವಿಜ್ಞಾನಿಗಳ ಪಾತ್ರ ನಿರ್ಣಾಯಕವಾಗಿದ್ದರೆ, ರಕ್ಷಣಾ ಕ್ಷೇತ್ರದಲ್ಲಿ ಯುದ್ಧವಿಮಾನಗಳನ್ನು ಹಾರಿಸುವ ಮೂಲಕ ಶೌರ್ಯ ಮೆರೆಯುತ್ತಿದ್ದಾರೆ. ವಿಮಾನಯಾನದಲ್ಲಿ ಜಗತ್ತಿನಲ್ಲೇ ಭಾರತವು ಅತಿ ಹೆಚ್ಚು ಮಹಿಳಾ ಪೈಲಟ್ಗಳನ್ನು ಹೊಂದಿದೆ. ದೇಶದ ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ಮಹಿಳೆಯರ ಪಾಲ್ಗೊಳ್ಳುವಿಕೆ 43% ಇದೆ. ದೇಶದ ಪಂಚಾಯತ್ರಾಜ್ ವ್ಯವಸ್ಥೆಯಲ್ಲಿ 46% ಮಹಿಳಾ ಚುನಾಯಿತ ಪ್ರತಿನಿಧಿಗಳಿದ್ದು, ದೇಶದಾದ್ಯಂತ 14.5 ಲಕ್ಷದಷ್ಟು ಮಹಿಳಾ ಪ್ರತಿನಿಧಿಗಳಿದ್ದಾರೆ. ಹಾಗಾಗಿ ಈ ಸೃಷ್ಟಿಯಲ್ಲಿ ಜೀವವೊಂದನ್ನು ಹೆತ್ತು ಹೊತ್ತು ಸಾಕಿ ಸಲಹುವ ಹೆಣ್ಣಿನ ಮೇಲಿನ ಸ್ತ್ರೀ ಭಕ್ತಿ ಎಲ್ಲರ ಬಾಳಲ್ಲಿ ತರಲಿ ಶಕ್ತಿ ಎಂದು ಆಶಿಸುತ್ತಾ ಆಕೆಯ ಗೌರವದ ರಕ್ಷಣೆಗೆ ಇಡೀ ಪುರುಷ ಸಮಾಜವೇ ಬೆಂಗಾವಲಾಗಿ ನಿಲ್ಲುವ ಸಂಕಲ್ಪ ಮಾಡಬೇಕಿದೆ.
