ಉದಯರಶ್ಮಿ ದಿನಪತ್ರಿಕೆ
ಸಿಂದಗಿ: ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತರಾಗಿರುವ ದಿ.ರವೀಂದ್ರ ಹಂದಿಗನೂರ ಅವರು ಸೆ.೧೩, ೨೦೧೩ರಂದು ಹೃದಯಾಘಾತದಿಂದ ಸಾವನ್ನಪ್ಪಿದರು. ಕಳೆದ ೧೨ವರ್ಷಗಳಿಂದ ಸ್ವಗ್ರಾಮದಲ್ಲಿ ಅನಾಥವಾಗಿ ಬಿದ್ದಿರುವ ಸಮಾಧಿಯನ್ನು ಕನ್ನಡ ಮತ್ತು ಸಂಸ್ಕ್ರುತಿ ಇಲಾಖೆ ತನ್ನ ಅಧಿನಕ್ಕೆ ತೆಗೆದುಕೊಂಡು ಗಜಲ್ ಸಂಗೀತ ಶಾಲೆ ಸ್ಥಾಪಿಸಲು ಹಾಗೂ ಪಟ್ಟಣದಲ್ಲಿ ಒಂದು ಅತ್ಯುತ್ತಮ ಭವನ ನಿರ್ಮಾಣ ಮಾಡಲು ಸ್ಥಳೀಯ ಜನಪ್ರತಿನಿಧಿಗಳು ಗಮನ ಹರಿಸಿದರರೇ ಮಾತ್ರ ಗಾನ ವಿದ್ವಾಂಸಕ ದಿ.ಪಂಡಿತ ರವೀಂದ್ರ ಹಂದಿಗನೂರ ಅವರಿಗೆ ನಿಜವಾದ ಗೌರವ ನೀಡಿದಂತಾಗುತ್ತದೆ. ಈ ಒಂದು ಸತ್ಕಾರ್ಯದ ಕುರಿತು ಶಾಸಕರು ಗಂಭೀರವಾಗಿ ಚಿಂತಿಸಲಿ ಎಂಬುವುದೇ ಗಜಲ್ ಗಾರುಡಿಗ ದಿ.ಪಂಡಿತ ರವೀಂದ್ರ ಹಂದಿಗನೂರ ಅವರ ಅಭಿಮಾನಿಗಳ ಹಾಗೂ ಸಂಗೀತ ಆಸಕ್ತರ ಮಹಾದಾಸೆಯಾಗಿದೆ ಎಂದು ಬರಹಗಾರ ಮೌಲಾಲಿ ಕೆ. ಆಲಗೂರ ಹೇಳಿದ್ದಾರೆ.
ಕನ್ನಡ ಗಜಲ್ನಲ್ಲಿ ಸಾವಿರಾರು ಹಾಡುಗಳನ್ನು ಹಾಡಿರುವ ಪಂಡಿತ್ ರವೀಂದ್ರ ಹಂದಿಗನೂರ ಅವರ ಸಂಗೀತ ಸಾಧನೆ ಹಿರಿದಾಗಿದೆ. ಉರ್ದು ಭಾಷೆಯಲ್ಲಿರುವ ಗಜಲ್ ಗಾಯನವನ್ನು ಮೊದಲ ಬಾರಿಗೆ ಕನ್ನಡದಲ್ಲಿ ಹಾಡಿ ಶ್ರೇಷ್ಠ ಸಂಗೀತ ಸಾಧಕ ಎನಿಸಿಕೊಂಡು ಜಿಲ್ಲೆ ಮತ್ತು ತಾಲೂಕಿನ ಕೀರ್ತಿ ಹೆಚ್ಚಿಸಿದ್ದಾರೆ. ಕನ್ನಡದ “ಗುಲಾಂ ಅಲಿ” ಎಂದು ಖ್ಯಾತಿ ಹೊಂದಿರುವ ಮಹಾನ್ ಸಂಗೀತ ದಿಗ್ಗಜ ರವೀಂದ್ರ ಹಂದಿಗನೂರ ನಮ್ಮ ಸಿಂದಗಿ ತಾಲೂಕಿನ ಹಂದಿಗನೂರ ಗ್ರಾಮದಲ್ಲಿ ಜನಿಸಿರುವುದು ನಮಗೆಲ್ಲರಿಗೂ ಹೆಮ್ಮೆಯ ವಿಷಯ. ಹೀಗಾಗಿ ಇವರ ಹೆಸರಿನಲ್ಲಿ ಸಿಂದಗಿ ಪಟ್ಟಣದಲ್ಲಿ ಸಾಹಿತ್ಯ, ಸಂಗೀತ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲು ಒಂದು ಸುಸಜ್ಜಿತ ಭವನ ನಿರ್ಮಾಣವಾಗಲಿ ಎಂದು ಮನವಿ ಮಾಡಿಕೊಂಡಿದ್ದಾರೆ.
