ವಿಜಯಪುರ: ಎಂ.ಬಿ.ಪಾಟೀಲರು ಕಾಮಧೇನುವಿದ್ದಂತೆ. ಅವರನ್ನು ಬೆಂಬಲಿಸಿ ಆಯ್ಕೆ ಮಾಡಿದರೆ ಮತಕ್ಷೇತ್ರ ಬಂಗಾರದ ಬಬಲೇಶ್ವರ ಆಗಲಿದೆ ಎಂದು ರೈತ ಮುಖಂಡ ಚನ್ನಪ್ಪ ಕೊಪ್ಪದ ಹೇಳಿದರು.
ಬಬಲೇಶ್ವರ ತಾಲೂಕಿನ ದಾಶ್ಯಾಳದಲ್ಲಿ ಕೆ.ಪಿ.ಸಿ.ಸಿ ಪ್ರಚಾರ ಸಮಿತಿ ಅಧ್ಯಕ್ಷ ಎಂ. ಬಿ. ಪಾಟೀಲ ಪರ ಪ್ರಚಾರ ಸಭೆಯಲ್ಲಿ ಮಾತನಾಡಿದ ಅವರು, ನಿರುಪಯುಕ್ತ ಜಾನುವಾರುಗಳಿಗೆ ಮೇವು ಹಾಕಿ ಪ್ರಯೋಜನವಿಲ್ಲ ಎಂದು ಮಾರ್ಮಿಕವಾಗಿ ಹೇಳಿದರು.
ಎಂ. ಬಿ. ಪಾಟೀಲರ ಬದ್ಧತೆಯಿಂದಾಗಿ ವಿಜಯಪುರ ಜಿಲ್ಲೆ ಮತ್ತು ಬಬಲೇಶ್ವರ ಮತಕ್ಷೇತ್ರ ನಂದನವನವಾಗಿವೆ. ಬರಮುಕ್ತವಾಗಿರುವ ಜಿಲ್ಲೆಯಲ್ಲಿ ಅಭಿವೃದ್ಧಿ ಪರ್ವ ಆರಂಭವಾಗಿದೆ. ಎಲ್ಲ ಸಮುದಾಯಗಳ ಅಭಿವೃದ್ಧಿಗೆ ಸಹಾಯ ಮಾಡುತ್ತಿರುವ ಅವರು, ವಿಜಯಪುರದಲ್ಲಿ ಕಿತ್ತೂರ ರಾಣಿ ಚನ್ನಮ್ಮ ಸಮುದಾಯ ಭವನ ನಿರ್ಮಾಣಕ್ಕೆ ರೂ. 3 ಕೋ. ಅನುದಾನ ನೀಡಿದ್ದಾರೆ. ವಿಜಯಪುರ ನಗರದಲ್ಲಿ ಬಸ್ ನಿಲ್ದಾಣದೊಳಗೆ ಕಿತ್ತೂರ ರಾಣಿ ಚನ್ನಮ್ಮ ವೃತ್ತ ನಿರ್ಮಿಸಲು ಸಹಾಯ ಮಾಡಿದ್ದಾರೆ. ಆದರೆ, ಬಿಜೆಪಿಯವರು ನಮ್ಮ ಜಗದ್ಗುಗುರುಗಳನ್ನು ಸತಾಯಿಸಿ ಪಾದಯಾತ್ರೆ ಮಾಡುವಂತೆ ಮಾಡಿ 2ಡಿ ಮೀಸಲಾತಿ ನೀಡಿದ್ದಾರೆ. ಈಗ ಅದಕ್ಕೂ ಕೂಡ ಸುಪ್ರೀಂ ಕೋರ್ಟ ತಡೆಯಾಜ್ಞೆ ನೀಡಿದೆ. ಬಿಜೆಪಿಯವರಿಂದ ಯಾರಿಗೂ ಪ್ರಯೋಜವಿಲ್ಲ. ಎಂ. ಬಿ. ಪಾಟೀಲರನ್ನು ನಾವೆಲ್ಲರೂ ಜಾತ್ಯತೀತವಾಗಿ ಬೆಂಬಲಿಸಿ ಗೆಲ್ಲಸೋಣ ಎಂದು ಹೇಳಿದರು.
ಕೆ.ಪಿ.ಸಿ.ಸಿ ಪ್ರಚಾರ ಸಮಿತಿ ಅಧ್ಯಕ್ಷ ಎಂ. ಬಿ. ಪಾಟೀಲ ಮಾತನಾಡಿ, ನೀರಾವರಿಯಿಂದಾಗಿ ಸರ್ವ ಸಮುದಾಯಗಳ ಅಭಿವೃದ್ಧಿಯಾಗಿದೆ. ನಮ್ಮ ಮಕ್ಕಳು ವಿದ್ಯಾವಂತರಾಗಿ ನೆಮ್ಮದಿ ಜೀವನ ಸಾಗಿಸುವಂತಾಗಬೇಕು. ಆದರೆ, ಎರಡೂ ಎಂಜಿನ್ ಫೇಲ್ ಆಗಿರುವ ಬಿಜೆಪಿಯಿಂದ ಅಭಿವೃದ್ಧಿ ಸಾಧ್ಯವಿಲ್ಲ. ಇದು ಮತದಾರರಿಗೂ ಮನವರಿಕೆಯಾಗಿದೆ. ಬೆಲೆ ಏರಿಕೆಯಿಂದ ತತ್ತರಿಸಿರುವ ಜನರ ಬದುಕು ರೂಪಿಸಲು ಮತ್ತೆ ಕಾಂಗ್ರೆಸ್ ಅಧಿಕಾರಿಕ್ಕೆ ಬರುವುದು ಅಗತ್ಯವಾಗಿದೆ. ಜನಹಿತಕ್ಕಾಗಿ ನಮ್ಮ ಪಕ್ಷ ಈಗಾಗಲೇ ಗೃಹ ಜ್ಯೋತಿ, ಗೃಹಲಕ್ಷ್ಮಿ, ಅನ್ನಭಾಗ್ಯ, ಯುವನಿಧಿ, ಸರಕಾರಿ ಬಸ್ಗಳಲ್ಲಿ ಮಹಿಳೆಯರಿಗೆ ಉಚಿತ ಪ್ರಯಾಣಕ್ಕೆ ಅವಕಾಶ ನೀಡುವುದು ಸೇರಿದಂತೆ ಆರು ಗ್ಯಾರಂಟಿ ಸ್ಕೀಂಗಳನ್ನು ಘೋಷಿಸಿದೆ ಎಂದು ತಿಳಿಸಿದರು.
ಮುಖಂಡ ರಾವಸಾಬ ಸಿ. ಬಿರಾದಾರ ಮಾತನಾಡಿ ಅಂಡಮಾನ ಮತ್ತು ನಿಕೋಬಾರನಂತೆ ನಡುಗಡ್ಡೆಯಾಗಿದ್ದ ದಾಶ್ಯಾಳ ಗ್ರಾಮಕ್ಕೆ ಎರಡೂ ಕಡೆ ಡೋಣಿ ನದಿಗೆ ಸೇತುವೆ ನಿರ್ಮಿಸಿದ್ದಾರೆ. ಸಿ.ಸಿ ರಸ್ತೆ, ಸಮುದಾಯ ಭವನ, ದೇವಸ್ಥಾನಗಳ ಅಭಿವೃದ್ಧಿ ಮಾಡಿದ್ದಾರೆ. ರಾಜಕೀಯವನ್ನು ಉದ್ಯೋಗ ಎಂದು ತಿಳಿದುಕೊಳ್ಳದೇ ಸಮಾಜ ಸೇವೆ ಎಂದು ನಂಬಿಕೊಂಡು ಜನಸೇವೆ ಮಾಡುತ್ತಿದ್ದಾರೆ. ನಮಗೆ ಸಿಕ್ಕಿರುವ ಅಪರೂಪದ ಮಾಣಿಕ್ಯದ ಪರ ನಾವೆಲ್ಲರೂ ನಿಲ್ಲೋಣ. ಅವರನ್ನು ಬಾರಿ ಅಂತರದಿಂದ ಗೆಲ್ಲಿಸೋಣ ಎಂದು ಹೇಳಿದರು.
ಮುಖಂಡರಾದ ಶಂಕ್ರಯ್ಯ ಸ್ವಾಮಿ, ಮಡಿವಾಳಯ್ಯ ಸ್ವಾಮಿ, ಆರ್.ಜಿ.ಯರನಾಳ, ಸಿದ್ದಪ್ಪ ಹೊಸಮನಿ, ರಾಮಗೊಂಡ ಸಂಖ, ರುದ್ರಗೊಂಡ ಸಂಗಾಪುರ, ಸಿದ್ದಪ್ಪ ಸತ್ಯಪ್ಪ ಬಿರಾದಾರ ಮುಂತಾದವರು ಉಪಸ್ಥಿತರಿದ್ದರು.
*** ಬಾಕ್ಸ್ ಸುದ್ಧಿ ****
ಈ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ವ್ಯಕ್ತಿಯೊಬ್ಬನಿಗೆ ಎಂ. ಬಿ. ಪಾಟೀಲರು ಹೇಳಿದ ಬುದ್ಧಿಮಾತು ಕಾರ್ಯಕ್ರಮದಲ್ಲಿ ಪಾಲ್ಗೊಂಡ ಜನತೆ ತಲೆದೂಗುವಂತೆ ಮಾಡಿತು. ನೀನು ಯುವಕನಾಗಿದ್ದಾಗ ಯುವ ಸಂಘ ರಚನೆಗೆ ಕೇಳಿದಷ್ಟು ಅನುದಾನ ನೀಡಿದ್ದೆ. ಈಗ ನೀನು ನನಗೆ ಬೆಂಬಲ ನೀಡದಿದ್ದರೂ ಪರವಾಗಿಲ್ಲ. ಆದರೆ, ಕೈ ಮುಗಿದು ಕೇಳುತ್ತೇನೆ. ಮಧ್ಯಸೇವನೆ ಬಿಟ್ಟುಬಿಡು ಎಂದು ಹೇಳಿದಾಗ ಕಾರ್ಯಕ್ರಮದಲ್ಲಿ ಪಾಲ್ಗೊಂಡ ಜನರು ಎಂ. ಬಿ. ಪಾಟೀಲರ ಜನಪರ ಕಾಳಜಿಗೆ ತಲೆದೂಗಿದರು. ಆಗ ಆ ವ್ಯಕ್ತಿ ಕೂಡ ಎದ್ದು ನಿಂತು ಕೈ ಮುಗಿದು ಮಧ್ಯಸೇವನೆ ಮಾಡುವುದಿಲ್ಲ ಎಂದು ಹೇಳಿದ್ದು, ರಾಜಕೀಯ ಜಂಜಾಟದ ಮಧ್ಯೆಯೂ ಎಂ. ಬಿ. ಪಾಟೀಲರು ಜನರ ಬಗ್ಗೆ ಹೊಂದಿರುವ ಕಾಳಜಿಗೆ ಸಾಕ್ಷಿಯಾಗಿತ್ತು.
