ನ.14 ರಂದು ತಿಕೋಟಾದ ಎ.ಬಿ.ಜತ್ತಿ ಶಾಲೆ ಆವರಣದಲ್ಲಿ ನಡೆವ ರಾಜ್ಯ ಮಟ್ಟದ ವಿಜ್ಞಾನ ಜಾತ್ರೆ
ಉದಯರಶ್ಮಿ ದಿನಪತ್ರಿಕೆ
ವಿಜಯಪುರ: ಗ್ರಾಮೀಣ ಮಕ್ಕಳಲ್ಲಿ ವೈಜ್ಞಾನಿಕ ಮನೋಭಾವ ಮೂಡಿಸಲು ನ.14 ರಂದು ಶನಿವಾರ ತಿಕೋಟಾದ ಎ.ಬಿ.ಜತ್ತಿ ಶಾಲೆ ಆವರಣದಲ್ಲಿ ನಡೆವ ರಾಜ್ಯ ಮಟ್ಟದ ವಿಜ್ಞಾನ ಜಾತ್ರೆಗೆ ಕ್ಷಣಗಣನೆ ಆರಂಭವಾಗಿದೆ.
ಮಕ್ಕಳ ದಿನಾಚರಣೆ ದಿನದಂದು ನಡೆಯುವ ಈ ಕಾರ್ಯಕ್ರಮಕ್ಕೆ ‘ವಿಜ್ಞಾನ ಸ್ವಾಮೀಜಿ’ ಎಂದೇ ಖ್ಯಾತರಾದ ನಾಗನೂರು ರುದ್ರಾಕ್ಷಿ ಮಠದ ಡಾ.ಸಿದ್ಧರಾಮ ಮಹಾಸ್ವಾಮೀಜಿಯವರು ಸಾನ್ನಿಧ್ಯ ವಹಿಸಲಿದ್ದು, ಪ್ರಾಥಮಿಕ ಹಾಗೂ ಪ್ರೌಢ ಶಿಕ್ಷಣ ಸಚಿವ ಮಧು ಬಂಗಾರಪ್ಪ ಅವರು ಉದ್ಘಾಟಿಸಲಿದ್ದಾರೆ ಎಂದು ಗ್ರಾಮೀಣ ವಲಯದ ಶಿಕ್ಷಣಾಧಿಕಾರಿ ಬಸವರಾಜ ತಳವಾರ ತಿಳಿಸಿದ್ದಾರೆ.
ಕೈಗಾರಿಕೆ, ಮೂಲ ಸೌಲಭ್ಯ ಅಭಿವೃದ್ಧಿ ಮತ್ತು ಜಿಲ್ಲಾ ಉಸ್ತುವಾರಿ ಸಚಿವ ಎಂ. ಬಿ. ಪಾಟೀಲ ಅವರು ಪ್ರದರ್ಶನದ ಸ್ಟಾಲ್‌ಗಳನ್ನು ಉದ್ಘಾಟಿಸಲಿದ್ದಾರೆ. ಇವರೊಂದಿಗೆ ಸಾರ್ವಜನಿಕ ಶಿಕ್ಷಣ ಇಲಾಖೆಯ ಧಾರವಾಡದ ಅಪರ ಆಯುಕ್ತ ಡಾ. ಈಶ್ವರ ಉಳ್ಳಾಗಡ್ಡಿ, ಜಿಲ್ಲಾಧಿಕಾರಿ ಡಾ. ಕೆ. ಆನಂದ, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಲಕ್ಷ್ಮಣ ನಿಂಬರಗಿ ಅವರು ಉಪಸ್ಥಿತರಿರಲಿದ್ದಾರೆ.
ಅಂದು ಬೆಳಗ್ಗೆ 11ಕ್ಕೆ ನಾಲ್ಕು ವಿಭಾಗಗಳ ವಿಜ್ಞಾನ ಪ್ರದರ್ಶನ ಮಳಿಗೆಗಳಿಗೆ ಇವರು ಚಾಲನೆ ನೀಡಲಿದ್ದಾರೆ. ಸಿಎಸ್‌ಆರ್ ಅನುದಾನ ಸೇರಿದಂತೆ ನಾನಟ ಶಾಲಾ ಅಭಿವೃದ್ಧಿಯ ಸಾಕ್ಷ್ಯಚಿತ್ರ ಪ್ರದರ್ಶನ ನಡೆಯಲಿದೆ. ಕೆ.ಎಲ್.ಇ. ತಾಂತ್ರಿಕ ವಿಶ್ವವಿದ್ಯಾಲಯದ ಹುಬ್ಬಳ್ಳಿಯ ಭೌತಶಾಸ್ತ್ರ ವಿಭಾಗದ ಪ್ರಾಧ್ಯಾಪಕ ಮತ್ತು ಡೀನ್ ಡಾ. ನರಸಿಂಹ ಎಚ್. ಆಯಚಿತ್ ಅವರು ವಿಜ್ಞಾನದ ಅಗತ್ಯ ಮತ್ತು ಅನಿವಾರ್ಯತೆ ಬಗ್ಗೆ ಭಾಷಣ ಮಾಡಲಿದ್ದಾರೆ.
ಗಣ್ಯರಿಗೆ ವಿಜ್ಞಾನದ ಪುಸ್ತಕಗಳನ್ನು ನೀಡಿ, ದೀಪಕ್ಕೆ ಎಣ್ಣೆಯ ಬದಲು ನೀರು ಹಾಕಿ, ಬತ್ತಿ ಹೊತ್ತಿಸುವ ಪ್ರಯೋಗದೊಂದಿಗೇ ಸಭೆಯನ್ನು ಆರಂಭಿಸುತ್ತಿರುವುದು ವಿಶೇಷ ಎಂದು ಅವರು ತಿಳಿಸಿದ್ದಾರೆ.
ಸರಕಾರಿ, ಅನುದಾನಿತ ಮತ್ತು ಅನುದಾನ ರಹಿತ ಶಾಲೆಗಳ ವಿದ್ಯಾರ್ಥಿಗಳು ಸೇರಿ ಹತ್ತು ಸಾವಿರ ಜನ ಪಾಲ್ಗೊಳ್ಳಲಿದ್ದು, ಕ್ಷೇತ್ರ ಶಿಕ್ಷಣಾಧಿಕಾರಿಗಳ ಕಾರ್ಯಾಲಯ(ಗ್ರಾಮೀಣ ವಲಯ), ಪ್ರತಿಷ್ಠಿತ ಬಿ.ಎಲ್.ಡಿ.ಇ ಸಂಸ್ಥೆ ಮತ್ತು ಅಗಸ್ತ್ಯ ಫೌಂಡೇಶನ್ ಸಹಯೋಗದಲ್ಲಿ ನಡೆವ ಜಾತ್ರೆಯಲ್ಲಿ ಇಷ್ಟು ಮಟ್ಟದ ಜನರು ಸೇರುತ್ತಿರುವುದು ಇದೇ ಮೊದಲು. ಉಸ್ತುವಾರಿ ಸಚಿವ ಎಂ. ಬಿ. ಪಾಟೀಲ ಅವರ ಮಹತ್ವಾಕಾಂಕ್ಷೆಯ ಕಾರ್ಯಕ್ರಮ ಇದಾಗಿದೆ ಎಂದಿದ್ದಾರೆ.
ಮಾನವನ ದೇಹದ ಪರಿಚಯ ಮತ್ತು ತಾಂತ್ರಿಕ ಪ್ರದರ್ಶನ
ವಿಜಯಪುರ ಗ್ರಾಮೀಣ ವಲಯದ ವಿವಿಧ ಕ್ಲಸ್ಟರ್‌ಗಳಲ್ಲಿನ ಸ್ಪರ್ಧೆಗಳಲ್ಲಿ ಆಯ್ಕೆಯಾದ ವಿದ್ಯಾರ್ಥಿ ಯೋಜನೆಗಳು ಇಲ್ಲಿ ಇರಲಿವೆ. ಮಕ್ಕಳ ದಿನದಂದೇ ಇದು ನಡೆಯುತ್ತಿರುವುದು ವಿಶೇಷ. ಸರಕಾರಿ ಶಾಲೆಯ ಐದರಿಂದ ಹತ್ತನೇ ತರಗತಿಯ ಪಠ್ಯಗಳಲ್ಲಿನ ಶೇ.60ರಷ್ಟು ವಿಜ್ಞಾನ ಪರಿಕಲ್ಪನೆಗಳನ್ನು ಸರಳವಾಗಿ ಅರ್ಥಮಾಡಿಕೊಳ್ಳಲು ಇದು ನೆರವಾಗಲಿದೆ. ಓದುವ ವಿಜ್ಞಾನವನ್ನು ನೇರವಾಗಿ ನೋಡುವ, ಮುಟ್ಟುವ ಮತ್ತು ಪ್ರಯೋಗಗಳ ಮೂಲಕ ತಿಳಿವ ಅವಕಾಶ ಗ್ರಾಮೀಣರಿಗೆ ದೊರೆಯಲಿದೆ.
ಕಡಿಮೆ ವೆಚ್ಚದ ರೋಬೋಟ್‌ಗಳು, ಸಂವೇದಕ ಆಧಾರಿತ ಮಾದರಿಗಳು, ವಿದ್ಯುತ್, ಕಾಂತತ್ವ, ಬೆಳಕಿನ ವಿಜ್ಞಾನ, ರಾಸಾಯನಿಕ ಕ್ರಿಯೆಗಳು, ದ್ಯುತಿ ಸಂಶ್ಲೇಷಣೆ, ಮಾನವನ ದೇಹದ ರಚನೆ, ಪಂಚೇಂದ್ರಿಯಗಳು ಸೇರಿದಂತೆ ಹಲವು ವಿಜ್ಞಾನ ಪರಿಕಲ್ಪನೆಗಳನ್ನು ಆಧರಿಸಿದ ಮಾದರಿಗಳು ಪ್ರದರ್ಶನಗೊಳ್ಳಲಿವೆ. ವಾಯುಮಾಲಿನ್ಯವನ್ನು ಪತ್ತೆಹಚ್ಚುವ ‘ಏರ್ ಗಾರ್ಡ್’, ನೀರಿನ ಮಟ್ಟವನ್ನು ಗುರುತಿಸುವುದು, ತೇವಾಂಶವನ್ನು ಅಳೆವ ಸಾಧನ ಸೇರಿದಂತೆ ವಿದ್ಯಾರ್ಥಿಗಳು, ಶಿಕ್ಷಕರ ಮಾದರಿಗಳು, ಮಾನವನ ದೇಹದ ಪರಿಚಯ ಮತ್ತು ತಾಂತ್ರಿಕ ಪ್ರದರ್ಶನಗಳೂ ಇರಲಿವೆ.
