ಉದಯರಶ್ಮಿ ದಿನಪತ್ರಿಕೆ
ಸಿಂದಗಿ: ಸಿಂದಗಿಯಿಂದ ಆರಂಭವಾಗಿರುವ ಹೋರಾಟ ಜಿಲ್ಲೆಯ ಪ್ರತಿಯೊಂದು ಹೋಬಳಿ ಮಟ್ಟಕ್ಕೂ ವಿಸ್ತರಿಸಿ ಜನಾಂದೋಲನವಾಗಬೇಕು ಎಂದು ನಿವೃತ್ತ ಪ್ರಾಧ್ಯಾಪಕ ಡಾ.ಅರವಿಂದ ಮನಗೂಳಿ ಹೇಳಿದರು.
ನಗರದ ಬಸವೇಶ್ವರ ವೃತ್ತದ ಬಳಿ ಗೋಕಾಕ ಚಳವಳಿಯ ರೂವಾರಿ ರೇ.ಚ.ರೇವಡಿಗಾರ ಪ್ರತಿಷ್ಠಾನ ಹಾಗೂ ೩೭೧(ಜೆ) ಹೋರಾಟ ಸಮಿತಿಯ ನೇತೃತ್ವದಲ್ಲಿ ೧೦ದಿನಗಳಿಂದ ನಡೆಯುತ್ತಿರುವ ಧರಣಿ ಸತ್ಯಾಗ್ರಹಕ್ಕೆ ದಲಿತ ಸಂಘರ್ಷ ಸಮಿತಿ (ನಾಗವಾರ ಬಣ), ಮೆಡಿಕಲ್ ಅಸೋಸಿಯೇಷನ್, ಲ್ಯಾಬ್ ಟೆಕ್ನಿಷಿಯನ್ ಸಂಘ, ಲಯನ್ಸ್ ಕ್ಲಬ್, ಕರ್ನಾಟಕ ರಾಜ್ಯ ಪ್ರಾಂತ ರೈತ ಸಂಘ ಸೇರಿದಂತೆ ವಿವಿಧ ಸಂಘ-ಸಂಸ್ಥೆಗಳು ಹಾಗೂ ಸಾಸಾಬಾಳ, ಮಾಡಬಾಳ ಗ್ರಾಮದ ಗಣ್ಯರು ಬೆಂಬಲ ವ್ಯಕ್ತಪಡಿಸಿದ ಸಂದರ್ಭದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಸರ್ಕಾರಕ್ಕೆ ಅಗತ್ಯವಿರುವ ಎಲ್ಲ ಮಾಹಿತಿಗಳನ್ನು ಒದಗಿಸಲು ಹೋರಾಟಗಾರರು ಸಿದ್ಧರಿರಬೇಕು. ಸರ್ಕಾರ ಕೂಡಲೇ ಎಚ್ಚೆತ್ತುಕೊಂಡು ವಿಜಯಪುರ ಜಿಲ್ಲೆಯನ್ನು ೩೭೧(ಜೆ) ಕಲಂ ವ್ಯಾಪ್ತಿಗೆ ಸೇರಿಸಬೇಕು. ಈ ಭಾಗದ ಜನರಿಗೆ ಶಿಕ್ಷಣ ಮತ್ತು ಉದ್ಯೋಗದಲ್ಲಿ ನ್ಯಾಯ ದೊರಕಿಸಿಕೊಡಬೇಕು ಎಂದು ಒತ್ತಾಯಿಸಿದರು.
ಈ ವೇಳೆ ಸಾಸಾಬಾಳದ ನಿವೃತ್ತ ಶಿಕ್ಷಕ ಬಾಬುಗೌಡ ಬಿರಾದಾರ ಮಾತನಾಡಿದರು. ಪ್ರಾಧ್ಯಾಪಕ ಐ.ಬಿ.ಬಿರಾದಾರ, ಕೆ.ಎಚ್.ಸೋಮಾಪುರ, ದಸಂಸ ಸಂಚಾಲಕ ಪರಶುರಾಮ ಕಾಂಬಳೆ, ಅಣ್ಣಾರಾಯ ಈಳಗೇರ, ಶಬ್ಬೀರ ಪಟೇಲ ಬಿರಾದಾರ, ಮಾಡಬಾಳದ ಎಸ್.ಎಸ್.ಪೂಜಾರಿ, ಭೀಮಾಶಂಕರ ಅಗಸರ, ಮಂಜುನಾಥ ಬಿಜಾಪುರ, ಶಾಂತು ಕುಂಬಾರ, ಸುನೀಲ ಬಜಂತ್ರಿ ಹಾಗೂ ವಕೀಲ ಡಿ.ಎ. ಚನ್ನಗೊಂಡ ಸೇರಿದಂತೆ ಹಲವರು ಮಾತನಾಡಿ ಹೋರಾಟಕ್ಕೆ ಬೆಂಬಲ ಸೂಚಿಸಿದರು.
ಈ ಸಂದರ್ಭದಲ್ಲಿ ರಂಗನಾಥ ಥೋರ್ಫೆ, ರಾಚಪ್ಪ ವಾರದ, ಎಸ್.ಬಿ.ಚಾಗಶೆಟ್ಟಿ, ಡಾ.ಅಂಬರೀಶ ಬಿರಾದಾರ, ಪ್ರಕಾಶ ಕಟ್ಟಿಮನಿ, ಅರ್ಜುಣ ರೆಬಿನಾಳ, ಗುರುರಾಜ ಬಗಲಿ, ಮಾನಸಿದ್ದ ನಾಯ್ಕೋಡಿ, ರಾಜು ಹೊಳಕುಂದಿ, ಶರಣಪ್ಪ ಹರಿಜನ್, ಸಿದ್ದಣ್ಣ ಬಿರಾದಾರ, ಎಸ್.ಆರ್.ಪಾಟೀಲ, ಸಿದ್ದು ಕಡಗಂಚಿ ಉಪಸ್ಥಿತರಿದ್ದರು.
