ಆಲಮಟ್ಟಿಯಲ್ಲಿನ ಹಳಕಟ್ಟಿ ಪ್ರೌಢಶಾಲೆಯಲ್ಲಿ ಕರಕುಶಲ ಕಲೆ ಪ್ರದರ್ಶನ, ಜಾಗೃತಿ ಕಾರ್ಯಕ್ರಮ
ಉದಯರಶ್ಮಿ ದಿನಪತ್ರಿಕೆ
ಆಲಮಟ್ಟಿ: ಅಲ್ಲಿ ವಿಭಿನ್ನ ಕಲ್ಪನೆಯ ಸ್ಪರ್ಶವುಳ್ಳ ಮಾನವನ ಕೈಚಳಕದಿಂದ ಉಪಯುಕ್ತ ವಸ್ತುಗಳು ನಾವೀನ್ಯತೆಯಿಂದ ತಯಾರಾಗುತ್ತಿದ್ದವು. ನಿರುಪಯುಕ್ತ ಸಾಮಗ್ರಿಗಳು ಜೀವ ವೈವಿಧ್ಯತೆಯ ರೂಪ ಪಡೆದು ಉಪಯುಕ್ತವಾಗಿ ಕಣ್ಮನ ಸೆಳೆಯುತ್ತಿದ್ದವು. ಇಂಥದೊಂದು ಕಲಾ ಸಾಧನಗಳ ದೃಶ್ಯಗಳನ್ನು ಕೌತಕದಿಂದ ವೀಕ್ಷಿಸುತ್ತಿದ್ದ ಮಕ್ಕಳ ಕಣ್ಣಂಚಿನಲ್ಲಿ ಕರಕುಶಲ ಕಲೆಗಳ ವೈವಿಧ್ಯಮಯ ಪರಂಪರೆ ಅನಾವರಣಗೊಂಡಿತ್ತು !
ಇಲ್ಲಿನ ಆರ್.ಬಿ.ಪಿ.ಜಿ.ಹಳಕಟ್ಟಿ ಪ್ರೌಢಶಾಲೆ ಕರಕುಶಲ ಕಲೆಗಳ ಪರಿಕಲ್ಪನೆಯ ಸೃಜನಾತ್ಮಕ ಕಲಾಮೇಳದ ರಸಗಾನಕ್ಕೆ ಈಚೆಗೆ ಸಾಕ್ಷಿಯಾಗಿತ್ತು !
ಭಾರತ ಸರಕಾರ ಜವಳಿ ಸಚಿವಾಲಯದ ಕರಕುಶಲ ವಿಭಾಗದ ಮಾಕೆ೯ಟಿಂಗ್ ಸಹಾಯ ಮತ್ತು ಸೇವೆಗಳು ಎನ್ಎಚ್.ಡಿ.ಪಿ ಅಡಿಯಲ್ಲಿ ಕರಕುಶಲ ಕಲೆಗಳ ಪ್ರದರ್ಶನ ಹಾಗೂ ಜಾಗೃತಿ ಕಾರ್ಯಕ್ರಮ ಸಂಯೋಜನೆಗೊಂಡಿತ್ತು.
ಇದರಂಗವಾಗಿ ನಡೆದ ಪ್ರಾತ್ಯಕ್ಷಿಕೆ ತೋರಣದಲ್ಲಿ ಕರಕುಶಲ ಕಲೆಗಳ ರಸದೌತಣ ಮಕ್ಕಳು ಸವಿಯುವ ಸುಯೋಗ ಒದಗಿತು. ಕರಕುಶಲ ವಸ್ತುಗಳ ತಯಾರಿಕೆಯ ಕಲಾ ಕೌಶಲ್ಯ ಕಣ್ತುಂಬಿಸಿಕೊಂಡು ಯುವಕರು ಸಂತಸಪಟ್ಟರು.
ಸಂಪನ್ಮೂಲ ವ್ಯಕ್ತಿಗಳು ಪ್ರದಶಿ೯ಸಿದ ಪ್ರಾತ್ಯಕ್ಷಿಕೆಯಲ್ಲಿ ಕಲಾತ್ಮಕವಾಗಿ ಸೃಜನಶೀಲತೆಯಿಂದ ಹಲ ಬಗೆಯ ವಸ್ತುಗಳು ತಯಾರಾಗಿ ಸೌಂದರ್ಯ ಮೀಮಾಂಸೆಯೊAದಿಗೆ ಕರಕುಶಲ ಕಲಾಭಿರುಚಿ ಪ್ರಜ್ಞೆ ಮಕ್ಕಳಲ್ಲಿ ಮೂಡಿಸುವಲ್ಲಿ ವಿಶಿಷ್ಟ ಪಾತ್ರ ವಹಿಸಿತು.
ಸ್ವಹಸ್ತದಿಂದ ವಸ್ತುಗಳು ಅಲಂಕಾರಿಕವಾಗಿ ವಿನ್ಯಾಸಗೊಳ್ಳುತ್ತಿದ್ದವು. ಇದನ್ನು ಕಂಡು ವಿದ್ಯಾರ್ಥಿಗಳು ಖುಷಿಯಿಂದ ಚಪ್ಪಾಳೆ ತಟ್ಟಿ ಆತ್ಮತೃಪ್ತಿಯಿಂದ ಸಂಭ್ರಮಿಸಿದರು. ತಂತ್ರಜ್ಞಾನದ ಪರಂಪರೆಯಲ್ಲಿ ಹಳೆಯ ಪ್ರಾಚೀನ ಕಾಲದಲ್ಲಿನ ಕಲೆಗಳ ಹಾಗೂ ಪ್ರಕೃತಿ ಪೂರಕ ವಸ್ತುಗಳ ಸುಗಂಧ ಕಲಾ ವೈಭವದ ಶ್ರೀಮಂತಿಕೆ ಪರಿಮಳಿಸಿತು. ಈ ಕರಕುಶಲ ಕಲಾ ಕಳೆ ಮಕ್ಕಳ ಮನದಲ್ಲಿ ಹೊಸ ಭಾಷ್ಪ ತೆರೆಯಿಸಿತು. ಕರಕುಶಲ ಕಲಾಂಕುರದ ಬುತ್ತಿಯಲ್ಲಿ ಸಂಗಮಿಸಿ ವಿಹರಿಸಿದರು. ಶ್ರಮ, ಸಂಸ್ಕೃತಿ ಮಹತ್ವ ಅರಿತು ಬದುಕಿನ ಆಶಾಭಾವ ಸಾಧನದ ಇಂಚರ ತಿಳಿದುಕೊಳ್ಳಲು ಪ್ರಯತ್ನಿಸಿದ್ದು ವಿಶೇಷ.
ಕಾರ್ಯಕ್ರಮದಲ್ಲಿ ಸಂಪನ್ಮೂಲ ವ್ಯಕ್ತಿಗಳಾಗಿ ಪಾಲ್ಗೊಂಡಿದ್ದ ಕಾಳಪ್ಪ ಬಡಿಗೇರ, ಮುತ್ಪಪ್ಪ ಬುಡ್ಡರ, ಶರಣಪ್ಪ ಕುಂಬಾರ, ಶ್ರೀಮತಿ ರೇಣುಕಾ ಬಡಿಗೇರ ವಿವಿಧ ಪ್ರಾತ್ಯಕ್ಷಿಕೆ ನೀಡಿ ಮಕ್ಕಳಿಗೆ ಹುರಿದುಂಬಿಸಿದರು.
ಬಿದಿರಿನ ಬುಟ್ಟಿ ತಯಾರಿಸುವುದು, ರೊಟ್ಟಿ ಬುಟ್ಟಿ ಮರ ಹೆಣೆಯುವುದು, ಕುಂಬಾರಿಕೆ ಕಲೆಯಲ್ಲಿ ಮಣ್ಣಿನ ಮಡಿಕೆ,ಗಡಿಗೆ ತಯಾರಿಸುವದು, ಬಡಿಗೇತನ ಕಲೆಯಲ್ಲಿ ಕಟ್ಟಿಗೆ ಮೇಲೆ ದೇವತಾಕೃತಿಗಳ ಕೆತ್ತನೆ, ಕಸೂತಿ ಕಲೆಯಲ್ಲಿ ಬಟ್ಟೆಗಳ ಮೇಲೆ ನಕ್ಷಾ ಚಿತ್ತಾರಗಳ ವರ್ಣನೆ ಕಲಾ ಬಿಂಬ ಸೃಜೀಸುವ ಕಸೂತಿ ಕಲೆ, ಮರಗೆಲಸದ ಚಾತುರ್ಯಗಳು ಹೀಗೆ ಹಲ ಕರಕುಶಲ ವಸ್ತುಗಳು ಈ ಕಲಾ ಮೇಳದ ಪ್ರಾತ್ಯಕ್ಷಿಕೆಯಲ್ಲಿ ಅಕರ್ಷಣೆಯಿಂದ ಅಚ್ಚಾದವು.
ಭಾರತ ಸರಕಾರ ಜವಳಿ ಮಂತ್ರಾಲಯ ಕರಕುಶಲ ವಿಭಾಗದ ಅಸಿಸ್ಟೆಂಟ್ ಡೈರೆಕ್ಟರ್ ಕಿರಣ ವ್ಹಿ.ಎನ್, ಗ್ರಾಮೀಣಾಭಿವೃದ್ಧಿ ಸಂಸ್ಥೆ ಅಧ್ಯಕ್ಷ ಶಿವಬಸಯ್ಯ ಮಠಪತಿ, ಮುಖ್ಯೋಪಾಧ್ಯಾಯ ಜಿ.ಎಂ.ಕೋಟ್ಯಾಳ ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.
ಕರಕುಶಲದ ಚಟುವಟಿಕೆಯಲ್ಲಿ ಪಾಲ್ಗೊಂಡು ಗಮನ ಸೆಳೆದ ಮಕ್ಕಳಿಗೆ ಪ್ರಮಾಣ ಪತ್ರ ಆಯೋಜಕರಿಂದ ವಿತರಿಸಲಾಯಿತು. ಶಿಕ್ಷಕರಾದ ಎನ್.ಎಸ್.ಬಿರಾದಾರ, ಎಸ್.ಎಚ್.ನಾಗಣಿ, ಆರ್.ಎಂ.ರಾಠೋಡ, ಎಂ.ಬಿ.ದಶವಂತ, ಶ್ರೀಧರ ಚಿಮ್ಮಲಗಿ, ಶ್ರೀಮತಿ ಸಾವಿತ್ರಿ ಸಜ್ಜನ, ಇಬ್ರಾಹಿಂ ಹುನಗುಂದ, ಕರುಣಿಕ ಸಚೀನ ಹೆಬ್ಬಾಳ ಇತರರಿದ್ದರು.
ಎಲ್.ಆರ್.ಸಿಂಧೆ ಪ್ರಾಥಿ೯ಸಿದರು. ಜಿ.ಆರ್.ಜಾಧವ ಸ್ವಾಗತಿಸಿ ನಿರೂಪಿಸಿ ವಂದಿಸಿದರು.
