ಸಿಇಓ ಖುದ್ದು ಸ್ಥಳಕ್ಕೆ ಧಾವಿಸದಿದ್ದರೆ ಡಿಎಸ್ಎಸ್ ಬೃಹತ್ ಹೋರಾಟದ ಎಚ್ಚರಿಕೆ!
ಉದಯರಶ್ಮಿ ದಿನಪತ್ರಿಕೆ
ವಿಜಯಪುರ / ಸಿಂದಗಿ: ತಾಲೂಕಿನ ಕರವಿನಾಳ ಗ್ರಾಮದ ಶೋಷಿತ ನಿವಾಸಿಗಳ ಮೇಲಿನ ತಾರತಮ್ಯ, ಅಸ್ಪೃಶ್ಯತೆ ಹಾಗೂ ಮೂಲಸೌಕರ್ಯ ವಂಚನೆಯನ್ನು ದಲಿತ ಸಂಘರ್ಷ ಸಮಿತಿ, ದಲಿತ ಸ್ವರಾಜ್ಯ ಸೇನೆ -ಕರ್ನಾಟಕ ಹಾಗೂ ಭೀಮ್ ರಾಜ್ಯ ದಲಿತ ಸೇವಾ ಸಮಿತಿ ತೀವ್ರವಾಗಿ ಖಂಡಿಸಿವೆ.
ಸ್ವತಂತ್ರ ಭಾರತದಲ್ಲೂ ಸಾರ್ವಜನಿಕ ಬೋರ್ವೆಲ್ ನೀರು ಬಳಸಲು ಬಿಡದೆ ಜನರಿಗೆ ಕಿರುಕುಳ ನೀಡಲಾಗುತ್ತಿದೆ. ಪಂಚಾಯಿತಿಗೆ ನೂರಾರು ದೂರು ನೀಡಿದರೂ ಸ್ಥಳೀಯ ಆಡಳಿತ ಜಾತೀಯ ಮನಸ್ಥಿತಿಯಿಂದ ಮೌನ ವಹಿಸಿದೆ.
ಈ ತಾರತಮ್ಯ ಶಾಲಾ-ಅಂಗನವಾಡಿಗಳಿಗೂ ಹಬ್ಬಿದ್ದು, ಮಧ್ಯಾಹ್ನದ ಬಿಸಿಊಟ ವಿತರಣೆಯಲ್ಲಿ ಶೋಷಿತ ಸಮುದಾಯದ ಮಕ್ಕಳನ್ನು ಪ್ರತ್ಯೇಕಿಸಿ ಕೊನೆಯಲ್ಲಿ ಊಟ ಬಡಿಸುವ ಮೂಲಕ ಮಾನಸಿಕ ಕಿರುಕುಳ ನೀಡಲಾಗುತ್ತಿದೆ. ಓಣಿಯಲ್ಲಿ ಚರಂಡಿಯಿಲ್ಲದೆ ಸಾಂಕ್ರಾಮಿಕ ರೋಗಗಳ ಭೀತಿ ಆವರಿಸಿದೆ. ಜನಪ್ರತಿನಿಧಿಗಳು ಬಂದಾಗ ನಿವಾಸಿಗಳು ಅಳಲು ತೋಡಿಕೊಳ್ಳದಂತೆ ಸ್ಥಳೀಯ ಮುಖಂಡರು ತಡೆಯುತ್ತಿದ್ದು, ಸರ್ಕಾರಿ ಯೋಜನೆಗಳ ಮಾಹಿತಿಯನ್ನೇ ಮುಚ್ಚಿಟ್ಟು ಸಂಪೂರ್ಣವಾಗಿ ವಂಚಿಸಲಾಗುತ್ತಿದೆ.
ಆದ್ದರಿಂದ ಜಿಪಂ ಸಿಇಓ ಅವರು ತಕ್ಷಣವೇ ಖುದ್ದು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಬೇಕು.
ಈ ನ್ಯಾಯಯುತ ಬೇಡಿಕೆಗಳು ಈಡೇರದಿದ್ದರೆ ಜಿಲ್ಲಾ ಪಂಚಾಯತಿಗೆ ಮುತ್ತಿಗೆ ಹಾಕಿ ಬೃಹತ್ ಪ್ರತಿಭಟನೆ ನಡೆಸಲಾಗುವುದು ಹಾಗೂ ಉಂಟಾಗುವ ಅನಾಹುತಗಳಿಗೆ ಆಡಳಿತವೇ ಹೊಣೆ ಎಂದು ಮುಖಂಡರಾದ ಗೌಡಪ್ಪ ಬಡಿಗೇರ, ಅಮೃತ್ ಮಾವಿನಹಳ್ಳಿ, ಪ್ರಭು ಸಿಂಧೆ, ತಿಪ್ಪಣ್ಣ ಡಿ, ಸುಭಾಶ್ಚಂದ್ರ ಹೊನ್ನಕಂಠಿ, ಆರೂಢಸ್ವಾಮಿ ಕಬಾಡೆ, ಅಪ್ಪು ರಾಜ್ ಹಾಗೂ ಸುರೇಶ್ ಆಲಾಳ ಹಾಗೂ ಇತರ ಮುಖಂಡರು ಎಚ್ಚರಿಸಿದ್ದಾರೆ.
