ವಿಜಯಪುರದಲ್ಲಿ ಅರ್ಕಾಟ್ ದರ್ಗಾ ಉರುಸು ಹಾಗೂ ಹಜರತ್ ಗೌಸ್-ಏ ಆಜಂ ಸ್ಮರಣೆ ಪ್ರಯುಕ್ತ ಭವ್ಯ ಸದ್ಭಾವನಾ ಯಾತ್ರೆ
ಉದಯರಶ್ಮಿ ದಿನಪತ್ರಿಕೆ
ವಿಜಯಪುರ: ಮಾನವೀಯತೆಯ ತತ್ವಗಳನ್ನು ಸಾರಿದ ಹಜರತ್ ಗೌಸ್ ಏ ಅಜಂ ಅವರ ಸ್ಮರಣೆ ಹಾಗೂ ಸರ್ವಧರ್ಮ ಸಮನ್ವಯತೆಯ ಕೇಂದ್ರವಾಗಿರುವ ಹಜರತ್ ಅರ್ಕಾಟ್ ದರ್ಗಾದ ಉರುಸು ಪ್ರಯುಕ್ತ ಬುಧವಾರ ಭವ್ಯ ಭಕ್ತಿ-ಸದ್ಭಾವ ಯಾತ್ರೆ ನಡೆಯಿತು.
ಸಾವಿರಾರು ಸಂಖ್ಯೆಯಲ್ಲಿ ಭಕ್ತಾದಿಗಳು `ನಾರಾಯೇ ತಕ್ಬೀರ್ ಅಲ್ಲಾಹು ಅಕ್ಬರ್’ ಎಂದು ಭಕ್ತಿಭಾವದಿಂದ ಘೋಷಣೆ ಮೊಳಗಿಸುತ್ತಾ, ಪವಿತ್ರ ಧ್ವಜಗಳನ್ನು ಕೈಯಲ್ಲಿ ಹಿಡಿದು ಮೆರವಣಿಗೆಯಲ್ಲಿ ಪಾಲ್ಗೊಂಡರು.
ಪವಿತ್ರ ಪುಷ್ಪಗಳಿಂದ ರೂಪಿಸಲಾದ ಪಂಚ ಝೇಲಾಗಳು ಮೆರವಣಿಗೆಯಲ್ಲಿ ಗಮನ ಸೆಳೆದವು.
ಅರ್ಕಾಟ್ ದರ್ಗಾದ ಸಜ್ಜಾದೆ ನಶೀನ್ ಸೈಯ್ಯದ್ ಇಕ್ಬಾಲ್ ಪೀರಾ ಹಾಗೂ ಡಾ.ತಖೀಪೀರಾ ಹುಸೈನಿ ಅವರ ನೇತೃತ್ವದಲ್ಲಿ ಈ ಯಾತ್ರೆ ಆಯೋಜಿಸಲಾಗಿತ್ತು.
ವಿಜಯಪುರದ ಸೊಲ್ಲಾಪೂರ ನಾಕಾದಿಂದ ಆರಂಭಗೊಂಡ ಈ ಯಾತ್ರೆ ಪ್ರಮುಖ ಮಾರ್ಗಗಳಲ್ಲಿ ಸಂಚರಿಸಿ ಅರ್ಕಾಟ್ ದರ್ಗಾ ತಲುಪಿ ಸಂಪನ್ನಗೊಂಡಿತ್ತು.
ಈ ಸಂದರ್ಭದಲ್ಲಿ ಮಾತನಾಡಿದ ಧರ್ಮಗುರು ಡಾ.ಸೈಯ್ಯದ್ ತಖೀಪೀರಾ ಹುಸೈನಿ ಮಾತನಾಡಿ, ಹಜರತ್ ಗೌಸ್ ಪಾಕ್ ಅವರು ಒಬ್ಬ ಶ್ರೇಷ್ಠ ವ್ಯಕ್ತಿತ್ವವುಳ್ಳ ಚೇತನ, ಮಾನವೀಯತೆಗೆ ಹೆಸರಾಗಿದ್ದ ಅವರು ಶಾಂತಿ, ಸದ್ಭಾವದ ಸಂದೇಶ ಸಾರಿದ್ದಾರೆ, ಅವರ ತತ್ವಗಳನ್ನು ನಾವು ಅಳವಡಿಸಿಕೊಂಡು ಮುನ್ನಡೆಯಬೇಕು ಎಂದರು.
ಈ ಸಂದರ್ಭದಲ್ಲಿ ಡಾ.ಎಂ.ಎಸ್.ಮುಜಾವರ್, ಇರಾಫ್ ಸುನ್ನೇವಾಲೆ, ಮೆಹತೂಜ್ ಅಲಿ ಭಾಗವಾನ್, ಮೌಲಾನಾ ಹುಸೇನ್ ರಜ್ವಿ, ಮೌಲಾನಾ ನೌಶಾದ್ ಆಲಂ, ಆಶೀಫ ಭಾಗವಾನ, ಫಾರೂಖ ವಾಲೀಕಾರ, ಸಲೀಂ ಮಕಾಂದಾರ, ಸರ್ಫರಾಜ ಮಿರ್ಧೆ ಮತ್ತಿತರರು ಭಾಗವಹಿಸಿದ್ದರು.
ವಿಶೇಷ ಸನ್ಮಾನ
ಭವ್ಯ ಸದ್ಭಾವನಾ ಯಾತ್ರೆ ಗಾಂಧಿ ವೃತ್ತದ ಬಳಿ ಬರುತ್ತಿದ್ದಂತೆ ವಿಜಯಪುರ ನಗರ ಭಾಗವಾನ ಜಮಾತ್ ವತಿಯಿಂದ ವಿಶೇಷ ಸನ್ಮಾನ ನೆರವೇರಿಸಲಾಯಿತು.
