ವಿಜಯಪುರದಲ್ಲಿ ಶ್ರೀ ಗಜಾನನ ಉತ್ಸವ ಮಹಾಮಂಡಳ ವತಿಯಿಂದ ನಡೆದ ಸನ್ಮಾನ ಕಾರ್ಯಕ್ರಮ
ಉದಯರಶ್ಮಿ ದಿನಪತ್ರಿಕೆ
ವಿಜಯಪುರ: ಭಾಷಣಗಳಿಂದ ಹಿಂದೂತ್ವ ಬೆಳೆಯುವುದಿಲ್ಲ, ಆಚರಣೆಗಳಿಂದ ಹಿಂದುತ್ವ ಬೆಳೆಯುತ್ತದೆ ಆ ನಿಟ್ಟಿನಲ್ಲಿ ನಾವೆಲ್ಲ ಒಂದಾಗಿ ಗಣೇಶೋತ್ಸವ ಆಚರಣೆ ಮಾಡಬೇಕು. ಧರ್ಮ ಉಳಿಯಬೇಕಾದರೆ ಸಿಡಿಲ ಸನ್ಯಾಸಿ ಸ್ವಾಮೀಜಿ ವಿವೇಕಾನಂದರ ಮಾರ್ಗದರ್ಶನದಲ್ಲಿ ನಾವು ನಡೆಯಬೇಕು ಎಂದು ಮಾಜಿ ಸಚಿವ ಅಪ್ಪಾಸಾಹೇಬ ಪಟ್ಟಣಶೆಟ್ಟಿ ಹೇಳಿದರು.
ನಗರದ ಮಹಾತ್ಮಾ ಗಾಂಧಿ ವೃತ್ತದಲ್ಲಿ ರವಿವಾರ ಶ್ರೀ ಗಜಾನನ ಉತ್ಸವ ಮಹಾಮಂಡಳ ವತಿಯಿಂದ ನಗರದ ಗಜಾನನ ಮಂಡಳಿ ಅಧ್ಯಕ್ಷರಿಗಾಗಿ ಹಮ್ಮಿಕೊಳ್ಳಲಾಗಿದ್ದ ಸನ್ಮಾನ ಸಮಾರಂಭದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಎಲ್ಲ ಧರ್ಮದವರೂ ಒಟ್ಟಾಗಿ ಆಚರಿಸುವ ಯಾವುದಾದರೂ ಹಬ್ಬವಿದ್ದರೆ ಅದು ಗಣೇಶನ ಹಬ್ಬವಾಗಿದೆ ಎಂದರು.
ಮುಖಂಡ ರಾಘವ ಅಣ್ಣಿಗೇರಿ ಮಾತನಾಡಿ, ಗಣೇಶೋತ್ಸವದ ಸಂದರ್ಭದಲ್ಲಿ ಯುವಕರು ಕೇವಲ ಹಬ್ಬದ ಸಂಭ್ರಮಕ್ಕೆ ಸೀಮಿತವಾಗದೆ, ದೇಶದ ಏಕತೆ, ಶಾಂತಿ, ಸಂಸ್ಕೃತಿ ಹಾಗೂ ರಾಷ್ಟ್ರಭಕ್ತಿಯ ಬಗ್ಗೆ ಜಾಗೃತರಾಗಿರಬೇಕು ಎಂದು ಕರೆ ನೀಡಿದರು.
ಈ ಸಂದರ್ಭದಲ್ಲಿ ದಲಿತ ಮುಖಂಡ ಅಡಿವೆಪ್ಪ ಸಾಲಗಲ, ಶಿವಾನಂದ ಮಾನಕರ, ಗಜಾನನ ಉತ್ಸವ ಮಹಾಮಂಡಳ ಅಧ್ಯಕ್ಷ ಸಚಿನ ಚವ್ಹಾಣ, ಗೋಪಾಲ ಘಟಕಾಂಬಳೆ, ಪರಶುರಾಮ ರಜಪೂತ, ರವಿ ಬಗಲಿ, ಪ್ರಕಾಶ ಮಿರ್ಜಿ, ಭೀಮಾಶಂಕರ ಹದನೂರ, ರಾಜು ಬಿರಾದಾರ, ನಂದು ಗಡಗಿ, ಕಿಟ್ಟು ಬಂಡಿವಡ್ಡರ, ಕಾಂತು ಶಿಂದೆ, ರವಿ ಮುಕರ್ತಿಹಾಳ, ಮಹೇಶ ಕುಂಬಾರ, ಶರತ ಬಿರಾದಾರ, ಗುರು ಗೋಲಗೇರಿ, ರಾಜು ಹುನ್ನೂರ ಹಾಗೂ ಗಜಾನನ ಉತ್ಸವ ಮಹಾಮಂಡಳದ ಸದಸ್ಯರು ಉಪಸ್ಥಿತರಿದ್ದರು.
