ಉದಯರಶ್ಮಿ ದಿನಪತ್ರಿಕೆ
ವರದಿ: ರಾಜು ಕೆರುಟಗಿ
ವಿಜಯಪುರ: ನಗರದ ಪತ್ರಕರ್ತ ಸುನೀಲ ಗೋಡೆನ್ನವರ ಅವರು ಭಾನುವಾರ ವಿಶ್ವ ಯೋಗ ದಿನ ಪ್ರಯುಕ್ತ ಶನಿವಾರ ತಮ್ಮ ಇಬ್ಬರು ಮಕ್ಕಳೊಂದಿಗೆ ನೀರಿನಲ್ಲೇ ಯೋಗ ಮಾಡಿ ಎಲ್ಲರ ಗಮನ ಸೆಳೆದಿದ್ದಾರೆ.
ಅತ್ಯಂತ ಕಠಿಣವೆನಿಸುವ ಜಲಯೋಗದ ಮೂಲಕ ಆರೋಗ್ಯ, ಏಕಾಗ್ರತೆ ಮತ್ತು ಶಿಸ್ತಿನ ಮಹತ್ವ ಸಾರುತ್ತಿರುವ ಪತ್ರಕರ್ತ ಸುನೀಲ ಗೋಡೆನ್ನವರ ಅವರು ನೀರಿನ ಮೇಲೆ ತೇಲುತ್ತಾ, ಕಣ್ಣು ಮುಚ್ಚಿ ಧ್ಯಾನದಲ್ಲಿ ಮಗ್ನರಾಗುವುದು ಕಠಿಣ ಯೋಗಗಳಲ್ಲಿ ಒಂದಾಗಿದೆ ಎನ್ನುತ್ತಾರೆ ಸಿಂದಗಿಯ ಹಿರಿಯ ಯೋಗಪಟು ಗಂಗಾಧರ ಹಿರೇಮಠ ಅವರು.
ರವಿವಾರ ವಿಶ್ವ ಯೋಗ ದಿನದ ಅಂಗವಾಗಿ ಪತ್ರಕರ್ತ ಸುನಿಲ್ ಹಾಗೂ ಅವರ ಮಕ್ಕಳಾದ ಸಾತ್ವಿಕ್ ಮತ್ತು ಋತ್ವಿಕ್ ಅವರು ಶನಿವಾರ ಜಲಯೋಗ ಪ್ರದರ್ಶಿಸುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.
ಸಾಮಾನ್ಯವಾಗಿ ಯೋಗವನ್ನು ನೆಲದ ಮೇಲೆ ಮಾಡುವುದನ್ನು ನಾವು ನೋಡಿದ್ದೇವೆ. ಆದರೆ ನೀರಿನಲ್ಲೇ ಸಮತೋಲನ ಕಾಯ್ದುಕೊಂಡು ಪದ್ಮಾಸನ, ಉತ್ಕಟಾಸನ, ಶವಾಸನ ಸೇರಿದಂತೆ ಹಲವು ಆಸನಗಳನ್ನು ಮಾಡುವುದು ಸುಲಭದ ಮಾತಲ್ಲ. ಇದರ ಜೊತೆಗೆ ನೀರಿನಲ್ಲೇ ಪ್ರಾಣಾಯಾಮ ಅಭ್ಯಾಸ ಮಾಡಿ ದೇಹ ಮತ್ತು ಮನಸ್ಸಿನ ಮೇಲೆ ಸುನೀಲ ಅವರು ಹಿಡಿತ ಸಾಧಿಸುತ್ತಿದ್ದಾರೆ.
ನಿತ್ಯ ಕನಿಷ್ಠ ಎರಡು ಗಂಟೆಗಳ ಕಾಲ ಯೋಗಾಭ್ಯಾಸ ಮಾಡುವ ಈ ಕುಟುಂಬ, ಯೋಗವನ್ನು ಕೇವಲ ವ್ಯಾಯಾಮವಲ್ಲ, ಬದುಕಿನ ಶಿಸ್ತು ಎಂದು ಅಳವಡಿಸಿಕೊಂಡಿದೆ. ಇಂದು ಅನೇಕ ಯುವಕರು ದುಶ್ಚಟಗಳತ್ತ ಆಕರ್ಷಿತರಾಗುತ್ತಿರುವ ಸಂದರ್ಭದಲ್ಲಿ, ಈ ಕುಟುಂಬ ಮಾತ್ರ ಆರೋಗ್ಯಕರ ಜೀವನಶೈಲಿಯ ಮೂಲಕ ಮಾದರಿಯಾಗುತ್ತಿದೆ.
ನೀರಿನಲ್ಲಿ ಈಜು, ಯೋಗ ಮತ್ತು ಪ್ರಾಣಾಯಾಮವನ್ನು ಒಟ್ಟಿಗೆ ಅಭ್ಯಾಸ ಮಾಡುವ ಮೂಲಕ ಆರೋಗ್ಯದ ಜೊತೆಗೆ ಆತ್ಮವಿಶ್ವಾಸವನ್ನೂ ಬೆಳೆಸಿಕೊಳ್ಳುತ್ತಿದ್ದಾರೆ.
“ಜಲಯೋಗದಿಂದ ದೇಹದ ಸಮತೋಲನ ಹೆಚ್ಚುವುದರ ಜೊತೆಗೆ ಮನಸ್ಸು ಏಕಾಗ್ರತೆ ಹೊಂದಲು ಸಹಾಯವಾಗುತ್ತದೆ. ಮಾನಸಿಕ ಒತ್ತಡ ಕಡಿಮೆಯಾಗುವುದಲ್ಲದೆ ದೇಹ ಹೆಚ್ಚು ಚುರುಕಾಗುತ್ತದೆ. ಇದು ನನ್ನ ಸ್ವಾನುಭವ.”
– ಸುನೀಲ ಗೋಡೆನ್ನವರ
ಪತ್ರಕರ್ತರು, ವಿಜಯಪುರ
