ಉದಯರಶ್ಮಿ ದಿನಪತ್ರಿಕೆ
ವಿಜಯಪುರ: ರಾಷ್ಟ್ರೀಯ ಬಸವ ದಳ ವಿಜಯಪುರ ವತಿಯಿಂದ ನಗರದ ಬಸವೇಶ್ವರ ವೃತ್ತದ ಹತ್ತಿರ ರವಿ ಹಂಜ ಅವರ ಪ್ರತಿ ಕೃತಿ ದಹನ ಮಾಡಿ ಆಕ್ರೋಶ ವ್ಯಕ್ತಪಡಿಸಿ, ರವಿ ಹಂಜ ಅವರ ವಿರುದ್ಧ ಕಾನೂನು ಕ್ರಮ ಕೈಗೊಂಡು ಅವರನ್ನು ಬಂಧಿಸುವಂತೆ ಮತ್ತು ಬಸವ ಮಂಟಪ ಕೃತಿಯನ್ನು ಮುಟ್ಟುಗೋಲು ಹಾಕುವ ಕುರಿತು ಜಿಲ್ಲಾ ಆಡಳಿತದಿಂದ ಸನ್ಮಾನ್ಯ ಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್ ಅವರಿಗೆ ಮನವಿ ಸಲ್ಲಿಸಿದರು.
ಈ ವೇಳೆ ಸಂಗನಬಸವ ಸ್ವಾಮೀಜಿ ಪಿ.ಬಿ.ಹುಣಚ್ಚಾಳ ಮಠ ಅವರು ಮಾತನಾಡಿ, ಸಂಸ್ಕೃತಿಕ ನಾಯಕ ವಿಶ್ವಗುರು ಬಸವಣ್ಣನವರನ್ನು ಹಾಗೂ ಅಂಗಾಯತರನ್ನು ಅವಹೇಳನ ಮಾಡಿದ ಲೇಖಕ ರವಿ ಹಂಜ ಬಸವ ಭಕ್ತರ ಹಾಗೂ ಲಿಂಗಾಯತ ಸಮುದಾಯದವರ ಮನಸ್ಸಿಗೆ ತೀವ್ರ ಘಾಸಿ ಮಾಡಿರುತ್ತಾರೆ. ಇಡೀ ಲಿಂಗಾಯತ ಸಮುದಾಯಕ್ಕೆ ಮತ್ತು ವಿಶ್ವಗುರು ಬಸವಣ್ಣನವರ ಅನುಯಾಯಿಗಳ ಮನಸ್ಸಿಗೆ ನೋವುಂಟು ಮಾಡುವಂತೆ ಆಧಾರ ರಹಿತ ಆರೋಪ ಮಾಡಿರುವ ರವಿ ಹಂಜಿ ಅವರ ಕೃತಿ ಮತ್ತು ಮಾತುಗಳು ಸಮಾಜದ ಸ್ವಾಸ್ಥ್ಯ ಕದಡುವಂತಿವೆ ಎಂದರು.
ರಾಷ್ಟ್ರೀಯ ಬಸವದಳ ಜಿಲ್ಲಾ ಅಧ್ಯಕ್ಷ ಮಲ್ಲಿಕಾರ್ಜುನ ಹಳ್ಳಿ ಮಾತನಾಡಿ, ಬಸವ ಮಂಟಪ ಕೃತಿಯನ್ನು ರಾಜ್ಯ ಸರ್ಕಾರವು ತಕ್ಷಣವೇ ಮುಟ್ಟುಗೋಲು ಹಾಕಿಕೊಳ್ಳುವುದೇ ಸೂಕ್ತ ಎಂಬುದು ರಾಷ್ಟ್ರೀಯ ಬಸವದಳ ಅಭಿಪ್ರಾಯವಾಗಿದೆ. ಸಂವಿಧಾನದ ದತ್ತವಾದ ವಾಕ್ ಸ್ವಾತಂತ್ರ್ಯ ಮತ್ತು ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೆ ರಾಷ್ಟ್ರೀಯ ಬಸವದಳ ಗೌರವ ನೀಡುತ್ತದೆ. ಆದರೆ ಬಸವಣ್ಣನವರ ಕುರಿತು ಅವಹೇಳನಕಾರಿಯಾಗಿ ಮಾತನಾಡುವವರನ್ನು ಅಂತಹ ಬರಹವನ್ನು ರಾಷ್ಟ್ರೀಯ ಬಸವದಳ ಒಪ್ಪಲು ಸಾಧ್ಯವೇ ಇಲ್ಲ. ಕೂಡಲೇ ರವಿ ಹಂಜಿಯವರ ಎಲ್ಲ ವಿಡಿಯೋಗಳನ್ನು ಸಾಮಾಜಿಕ ಜಾಲತಾಣದಿಂದ ತೆಗೆದುಹಾಕಬೇಕು. ಸ್ವಯಂ ಪ್ರೇರಿತ ಪ್ರಕರಣವನ್ನು ದಾಖಲಿಸಿ ಕಾನೂನು ರೀತಿಯ ಕಠಿಣ ಕ್ರಮ ಜರುಗಿಸಬೇಕೆಂದು ಆಗ್ರಹಿಸಿದರು.
ಈ ಸಂದರ್ಭದಲ್ಲಿ ರಾಜ್ಯ ಗೌರವ ಅಧ್ಯಕ್ಷ ಬಸವರಾಜ ಕೊಂಡಗೂಳಿ, ಕಾರ್ಯಾಧ್ಯಕ್ಷ ಅಣ್ಣಾಸ್ವಾಮಿಗೂಳ ಪಾಟೀಲ, ಚೈತನಕುಮಾರ ಗಲಗಲಿ, ಬಾಬು ಇಬ್ರಾಹಿಂಪುರ, ಸಂತೋಷ ಬೇನೂರ, ಚೆನ್ನು ಕೊಂಡಗೂಳಿ, ರಾಹುತ ಮಲಜಿ, ಬಸವರಾಜ ಮೇಟಗಾರ, ಪರಶುರಾಮ ಬೊಮ್ಮನಹಳ್ಳಿ, ಪ್ರಭಾವತಿ ಹಳ್ಳಿ, ಮಹಾಂತೇಶ ಅಗಸರ, ಸಂಪತಕುಮಾರ ಇಂಗಳೇಶ್ವರ, ರಮೇಶ ಅಲ್ಲಿಭಾವಿ, ಚೆನಪ್ಪ ಗಂದಗಲ್ಲ, ರಾಜಪ್ಪ ಹಳ್ಳಿ, ಬಸವ ಕಿರಣ ಕೊಂಡಗೂಳಿ, ದೀಪಾ ಕೊಂಡಗೂಳಿ, ಎಂ ಜಿ ತಳವಾರ್, ಗಿರಿಜಾ ಚೌದರಿ, ಬಸವರಾಜ್ ಅಗಸರ, ರೇವತಿ ಬಿರಾದಾರ, ಯುವರಾಜ ಚೋಳಕೆ, ಬಿ ಎಸ್ ಬಿರಾದಾರ, ಕಮಲಾ ಚೌದರಿ, ಸಾವಿತ್ರಿ ಉಮದಿ, ಡಿ ಎ ಪಾಟೀಲ, ಪಿ ಎಂ ಹಳ್ಳಿ ಸೇರಿದಂತೆ ಮತ್ತಿತರರು ಉಪಸ್ಥಿತರಿದ್ದರು.

