ಕೊನೆ ಭಾಗಕ್ಕೆ ನೀರಿಲ್ಲ | ಪರಿಸ್ಥಿತಿ ಮುಂದುವರಿದರೆ ಉಗ್ರ ಹೋರಾಟದ ಎಚ್ಚರಿಕೆ
ಉದಯರಶ್ಮಿ ದಿನಪತ್ರಿಕೆ
ನಿಡಗುಂದಿ: ಚಿಮ್ಮಲಗಿ ಏತ ನೀರಾವರಿ ಯೋಜನೆಯ ಪಶ್ಚಿಮ ಕಾಲುವೆಯಲ್ಲಿ ಅಕ್ರಮ ಪಂಪ್ಸೆಟ್ ಹಾಗೂ ಸೈಫಾನ್ ಪೈಪ್ಗಳ ಮೂಲಕ ನೀರು ಎತ್ತಲಾಗುತ್ತಿರುವುದರಿಂದ ಕೊನೆ ಭಾಗದ ಗ್ರಾಮಗಳಿಗೆ ನೀರು ತಲುಪುತ್ತಿಲ್ಲ.
ಕಾಲುವೆಯ ಮೇಲ್ಭಾಗದ ಗ್ರಾಮಗಳಲ್ಲಿ ೬೦ರಿಂದ ೮೦ಕ್ಕೂ ಹೆಚ್ಚು ಅಕ್ರಮ ಪಂಪ್ಸೆಟ್ಗಳಿವೆ. ೫೩ ಕಿ.ಮೀ. ಉದ್ದದ ಕಾಲುವೆಯ ೨೫-೩೦ ಕಿ.ಮೀ. ವ್ಯಾಪ್ತಿಗೆ ಮಾತ್ರ ನೀರು ತಲುಪುತ್ತಿದ್ದು, ಉಳಿದ ಸುಮಾರು ೨೩ ಕಿ.ಮೀ. ವ್ಯಾಪ್ತಿಯ ನಿಡಗುಂದಿ, ಗೋನಾಳ, ಬೇನಾಳ, ಅಬ್ಬಿಹಾಳ, ಕಿರಿಶ್ಯಾಳ, ಉಣ್ಣಿಭಾವಿ, ಹುಣಶ್ಯಾಳ, ವಂದಾಲ ಗ್ರಾಮಗಳ ರೈತರು ವಂಚಿತರಾಗಿದ್ದಾರೆ.
ಈ ಹಿನ್ನೆಲೆಯಲ್ಲಿ ಅಕ್ರಮ ಪಂಪ್ಸೆಟ್ಗಳ ವಿದ್ಯುತ್ ಸಂಪರ್ಕ ಕಡಿತಗೊಳಿಸಿ, ವಶಕ್ಕೆ ಪಡೆದು ಕಾನೂನು ಕ್ರಮ ಕೈಗೊಳ್ಳುವಂತೆ ಕೆಬಿಜೆಎನ್ಎಲ್ನ ಎಎಲ್ಬಿಸಿ ಉಪವಿಭಾಗದ ಸಹಾಯಕ ಕಾರ್ಯನಿರ್ವಾಹಕ ಅಭಿಯಂತರರು ಸೆ.೧೬ರಂದು ಹೆಸ್ಕಾಂ ಅಧಿಕಾರಿಗಳಿಗೆ ಪತ್ರ ಬರೆದಿದ್ದಾರೆ.
ಅಕ್ರಮ ಸಂಪರ್ಕಕ್ಕೆ ನಿಡಗುಂದಿ ಮತ್ತು ಮುದ್ದೇಬಿಹಾಳ ಉಪವಿಭಾಗಗಳ ಲೈನ್ಮನ್ಗಳ ನಿರ್ಲಕ್ಷ್ಯವೇ ಕಾರಣ ಎಂದು ಆರೋಪಿಸಿರುವ ಕೊನೆ ಭಾಗದ ರೈತರಾದ ಗಂಗಾಧರ ವಾರದ, ಮುರಗೇಪ್ಪ ಅವಟಿ, ಪ್ರಕಾಶ ರೇಶ್ಮಿ, ಪಂಡಿತ ರಾಠೋಡ, ಚನ್ನಸಂಗಪ್ಪ ಗೌಡ ಪಾಟೀಲ ಮತ್ತಿತರರು, ಸಂಬಂಧಿಸಿದ ಲೈನ್ಮನ್ ಹಾಗೂ ಸೆಕ್ಷನ್ ಅಧಿಕಾರಿಗಳನ್ನು ಹೊಣೆಗಾರರನ್ನಾಗಿ ಮಾಡಬೇಕೆಂದು ಆಗ್ರಹಿಸಿದ್ದಾರೆ. ಪರಿಸ್ಥಿತಿ ಮುಂದುವರಿದರೆ ಉಗ್ರ ಹೋರಾಟ ನಡೆಸುವುದಾಗಿ ಎಚ್ಚರಿಸಿದ್ದಾರೆ.
