ಸಿಂದಗಿಗೆ ಗ್ರಾಮೀಣ ಪೊಲೀಸ್ ಠಾಣೆ ಮಂಜೂರು

ಉದಯರಶ್ಮಿ ದಿನಪತ್ರಿಕೆ

ಸಿಂದಗಿ: ನಗರ ವ್ಯಾಪ್ತಿಯಲ್ಲಿ ಪ್ರಕರಣಗಳ ಸಂಖ್ಯೆ ಹಾಗೂ ಜನ ದಟ್ಟಣೆ ಹೆಚ್ಚಾಗಿದ್ದು, ಅದನ್ನು ನಿಯಂತ್ರಿಸಿ ಸುಗಮಗೊಳಿಸುವ ಉದ್ದೇಶದಿಂದ ಸಿಂದಗಿಗೆ ಗ್ರಾಮೀಣ ಪೊಲೀಸ್ ಠಾಣೆ ಮಂಜೂರು ಮಾಡಲಾಗಿದೆ.
ಈ ಕುರಿತು ಮಂಗಳವಾರ ಸರ್ಕಾರದ ಅಧೀನ ಕಾರ್ಯದರ್ಶಿ ಕೆ.ಎನ್.ವನಜ ಆದೇಶ ಹೊರಡಿಸಿದ್ದಾರೆ. ಪ್ರಸ್ತಾವಿತ ಗ್ರಾಮೀಣ ಠಾಣೆಯಲ್ಲಿ ೨೦೨೧ರಲ್ಲಿ ೩೩, ೨೦೨೨ರಲ್ಲಿ ೩೫, ೨೦೨೩ರಲ್ಲಿ ೩೩, ೨೦೨೪ರಲ್ಲಿ ೩೧, ೨೦೨೫ರಲ್ಲಿ ೧೯ ಒಟ್ಟು ೧೫೧ ಸಿಂದಗಿ ವೃತ್ತದಲ್ಲಿ ೪೦,೪೩,೪೪,೪೭,೧೮ ಅಪಘಾತ ಪ್ರಕರಣಗಳು ದಾಖಲಾಗಿತ್ತು. ೨೦೨೧ ರಿಂದ ೨೦೨೫ರವರೆಗೆ ಒಟ್ಟೂ ೩೪೩ ಅಪಘಾತ ಪ್ರಕರಣಗಳು ದಾಖಲಾಗಿವೆ. ಈ ಹಿನ್ನೆಲೆಯಲ್ಲಿ ೨ ಪಿಎಸ್ಐ, ೪ ಎಎಸ್ಐ, ೧೨ಹೆಡ್ ಕಾನ್‌ಸ್ಟೆಬಲ್ ಹಾಗೂ ೨೪ ಸಿಬ್ಬಂದಿ ಸೇರಿ ೪೨ ವಿವಿಧ ದರ್ಜೆಯ ಹುದ್ದೆಗಳೊಂದಿಗೆ ಗ್ರಾಮೀಣ ಠಾಣೆ ಮಂಜೂರಾತಿ ಆದೇಶ ಹೋರಡಿಸಲಾಗಿದೆ.

“ಸಿಂದಗಿ ಪಟ್ಟಣದಲ್ಲಿ ಗ್ರಾಮೀಣ ಭಾಗದ ಜನರ ಸುರಕ್ಷತೆಗಾಗಿ ನೂತನ ಸಿಂದಗಿ ಗ್ರಾಮೀಣ ಪೊಲೀಸ್ ಠಾಣೆ ನಿರ್ಮಾಣಕ್ಕೆ ಮಂಜೂರಾತಿ ಒದಗಿಸಿದ ರಾಜ್ಯ ಸರ್ಕಾರಕ್ಕೆ ಅನಂತ ಧನ್ಯವಾದಗಳು. ಸಿಂದಗಿ ಮತಕ್ಷೇತ್ರದ ಕಾನೂನು ವ್ಯವಸ್ಥೆಗೆ ಇದರಿಂದ ಮತ್ತಷ್ಟು ಬಲ ದೊರಕಿದಂತಾಗಿದೆ. ನಮ್ಮ ಸಿಂದಗಿ ಪರಿಸರದಲ್ಲಿ ಶಾಂತಿ ಹಾಗೂ ನ್ಯಾಯದ ರಕ್ಷಣೆ ಪಡೆಯಲು ಇದು ಸಹಕಾರಿಯಾಗಲಿದೆ.”

– ಅಶೋಕ ಮನಗೂಳಿ
ಶಾಸಕರು, ಸಿಂದಗಿ