ಜಿಆರ್ಜಿ೧೫೨ ಹಾಗೂ ಜಿಆರ್ಜಿ೮೧೧ ತಳಿ ತೊಗರಿ ಬೀಜ ಬಿತ್ತನೆ ಮಾಡಿರುವ ಹೊಲಗಳಿಗೆ ಭೇಟಿ
ಉದಯರಶ್ಮಿ ದಿನಪತ್ರಿಕೆ
ಬಸವನಬಾಗೇವಾಡಿ: ತಾಲೂಕಿನ ಬಿಸನಾಳ ಗ್ರಾಮ ಸೇರಿದಂತೆ ವಿವಿಧ ಗ್ರಾಮಗಳಿಗೆ ಗುರುವಾರ ಸಂಜೆ ವಿಜ್ಞಾನಿಗಳ ತಂಡ ಹಾಗೂ ಕೃಷಿ ಅಧಿಕಾರಿಗಳ ತಂಡ ಜಿಆರ್ಜಿ೧೫೨ ಹಾಗೂ ಜಿಆರ್ಜಿ೮೧೧ ತಳಿ ತೊಗರಿ ಬೀಜ ಬಿತ್ತನೆ ಮಾಡಿರುವ ಹೊಲಗಳಿಗೆ ಭೇಟಿ ನೀಡಿ ತೊಗರಿ ಬೆಳೆಯನ್ನು ವೀಕ್ಷಿಸಿದರು.
ಈ ಸಂದರ್ಭದಲ್ಲಿ ಹಾಜರಿದ್ದ ಅಖಂಡ ಕರ್ನಾಟಕ ರೈತ ಸಂಘದ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಅರವಿಂದ ಕುಲಕರ್ಣಿ ಅವರು, ಕೃಷಿ ಇಲಾಖೆಯಿಂದ ವಿತರಿಸಿದ ಜಿಆರ್ಜಿ೧೫೨ ಮತ್ತು ಜಿಆರ್ಜಿ೮೧೧ ತೊಗರಿ ಬೀಜ ಕಳಪೆಯಾಗಿವೆ. ಬೀಜ ಕಳಪೆಯಾಗಿರುವದರಿಂದಾಗಿ ತೊಗರಿ ಕಾಯಿ ಹಿಡಿದಿಲ್ಲ. ಹವಾಮಾನದ ವೈಪರೀತ್ಯಯಾಗಲಿ ಇನ್ನಿತರ ಯಾವುದೇ ಸಮಸ್ಯೆ ತೊಗರಿ ಬೆಳೆ ಪರಿಣಾಮ ಬೀರಿಲ್ಲ. ಬೀಜ ಕಳಪೆಯಿಂದಾಗಿಯೇ ಈ ತೊಗರಿ ಬೆಳೆಗೆ ಕಾಯಿ ಆಗಿಲ್ಲ. ಇದರಿಂದಾಗಿ ರೈತರು ಮೋಸ ಹೋಗಿದ್ದಾರೆ. ಈ ಬೀಜ ವಿತರಿಸಿದ ಕಂಪನಿಯವರ ಮೇಲೆ ಕ್ರಿಮಿನಲ್ ಪ್ರಕರಣ ದಾಖಲಿಸಿ ಕಪ್ಪು ಪಟ್ಟಿಗೆ ಸೇರಿಸಬೇಕು. ವಿಮೆ ಕಟ್ಟದೇ ಇರುವ ರೈತರಿಗೂ, ವಿಮೆ ಕಟ್ಟಿದ ರೈತರಿಗೂ ಈ ಬೆಳೆಗೆ ಸೂಕ್ತ ಬೆಳೆ ಪರಿಹಾರವನ್ನು ಸರ್ಕಾರ ನೀಡಲು ಕ್ರಮ ತೆಗೆದುಕೊಳ್ಳಬೇಕು. ಈ ತೊಗರಿ ಬೆಳೆಯನ್ನು ಜಿಲ್ಲಾಧಿಕಾರಿಗಳಿಗೆ, ಕೃಷಿ ಇಲಾಖೆಯ ಆಯುಕ್ತರ ಮುಂದೆ ತೆಗೆದುಕೊಂಡು ಹೋಗಿ ಈ ಬೆಳೆಯ ಬಗ್ಗೆ ರೈತ ಸಂಘವು ಗಮನ ತಂದಿತ್ತು. ಸಂಘದ ಮನವಿ ಸ್ಪಂದಿಸಿ ಇದೀಗ ಅಧಿಕಾರಿಗಳು, ವಿಜ್ಞಾನಿಗಳು ಪರಿಶೀಲನೆ ಮಾಡುತ್ತಿರುವುದು ಸ್ವಾಗತಾರ್ಹ ಎಂದರು.
ಈ ಸಂದರ್ಭದಲ್ಲಿ ಕೃಷಿ ಇಲಾಖೆಯ ಸಹಾಯಕ ಕೃಷಿ ನಿರ್ದೇಶಕ ಎಂ.ಎಚ್.ಯರಝರಿ ಈ ತೊಗರಿ ಬೆಳೆಯನ್ನು ಪರಿಶೀಲನೆ ಮಾಡಿ ಸರ್ಕಾರಕ್ಕೆ ವರದಿ ಸಲ್ಲಿಸಲಾಗುವುದು ಎಂದು ಹೇಳಿದರು.
ಈ ಸಂದರ್ಭದಲ್ಲಿ ಡಾ.ಎಂ.ಪಿ.ಪೊದ್ದಾರ,ಡಾ.ಗೆದ್ದಿನ್ನವರ, ಡಾ.ಸೋರಗಾಂವಿ, ಡಾ.ಬಸಮ್ಮ ಕುಂಬಾರ,ರೈತರಾದ ಬಸನಗೌಡ ಚೌಧರಿ, ಶ್ರೀಶೈಲ ಚೌಧರಿ, ವಿಠ್ಠಲ ವಂದಗನೂರ,ಈರಯ್ಯ ಮುದುನೂರಮಠ ಇದ್ದರು.
