ಶಾಲಾ ಸುಧಾರಣಾ ಸಮಿತಿ ಪದಾಧಿಕಾರಿಗಳಿಗೆ ಸನ್ಮಾನ

ಬಸವನಬಾಗೇವಾಡಿ: ಪಟ್ಟಣದ ಬಾಲಕಿಯರ ಸರ್ಕಾರಿ ಪದವಿ ಪೂರ್ವ ಕಾಲೇಜಿಗೆ ೨೦೨೪-೨೫ ಸಾಲಿಗೆ ಶಾಲಾ ಸುಧಾರಣಾ ಸಮಿತಿಯ ಉಪಾಧ್ಯಕ್ಷರಾಗಿ ನೇಮಕಗೊಂಡ ಬಸವರಾಜ ಶೆಂಡೆ, ಮಹಿಳಾ ಸದಸ್ಯೆಯಾಗಿ ನೇಮಕಗೊಂಡ ದೀಪಾ ನಾಯ್ಕೋಡಿ ಅವರನ್ನು ಮಂಗಳವಾರ ಸಂಜೆ ಹಿರೇಮಠದ ಶಿವಪ್ರಕಾಶ ಶಿವಾಚಾರ್ಯ ಸ್ವಾಮೀಜಿ ಶ್ರೀಮಠದಲ್ಲಿ ಸನ್ಮಾನಿಸಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ಶ್ರೀಗಳು, ಶ್ರೀಮಠದ ಶಿಷ್ಯ ಬಳಗದಲ್ಲಿರುವ ಇಬ್ಬರನ್ನು ಕಾಲೇಜಿನ ಸುಧಾರಣಾ ಸಮಿತಿಗೆ ನೇಮಕ ಮಾಡಿರುವದು ಸಂತಸದಾಯಕ ಸಂಗತಿ. ನೂತನ ಸಮಿತಿ ಸದಸ್ಯರು ಕಾಲೇಜಿನ ಸಮಸ್ಯೆಗಳಿಗೆ ಪರಿಹಾರ ಒದಗಿಸುವಲ್ಲಿ ಪ್ರಾಮಾಣಿಕವಾಗಿ ಕಾರ್ಯನಿರ್ವಹಿಸುವ ಮೂಲಕ ಕಾಲೇಜಿನಲ್ಲಿ ಗುಣಮಟ್ಟದ ಶೈಕ್ಷಣಿಕ ಚಟುವಟಿಕೆಗಳು ನಡೆಯುವಂತೆ ಶ್ರಮಿಸಬೇಕೆಂದರು.
ಈ ಸಂದರ್ಭದಲ್ಲಿ ಸಂಗಪ್ಪ ಡಂಬಳ, ಬಸವರಾಜ ಗಚ್ಚಿನವರ, ಬಸವರಾಜ ಕಿಣಗಿ, ಲಕ್ಷ್ಮೀ ನಾಯ್ಕೋಡಿ, ಚಂದ್ರಶೇಖರ ಗೊಳಸಂಗಿ, ಗಿರಿಮಲ್ಲಪ್ಪ ಮೇಟಿ, ವಿರೇಶ ಹಿರೇಮಠ ಇತರರು ಇದ್ದರು.