ವಿಜಯಪುರ ದಲ್ಲಿ ದಾಖಲೆ ಬಿಡುಗಡೆ ಮಾಡಿದ ನಗರ ಶಾಸಕ ಬಸನಗೌಡ ಪಾಟೀಲ ಯತ್ನಾಳ ಆರೋಪ
ಉದಯರಶ್ಮಿ ದಿನಪತ್ರಿಕೆ
ವಿಜಯಪುರ: ಕೆಲವು ಮುಸ್ಲಿಂ ಮತದಾರರು ನಾಲ್ಕೈದು ಕಡೆಗಳ ಮತಪಟ್ಟಿಯಲ್ಲಿದ್ದಾರೆ, ಒಂದು ಕಡೆ ಬೇರೆ ಬಟ್ಟೆ ಹಾಕಿಕೊಂಡು ಫೋಟೋ ಇರಿಸಿದರೆ, ಇನ್ನೊಂದು ಮತ ಪಟ್ಟಿಯಲ್ಲಿ ಬೇರೆ ಉಡುಗೆಯಲ್ಲಿ ಅದೇ ವ್ಯಕ್ತಿ ಇದ್ದಾನೆ, ಕೆಲವು ವ್ಯಕ್ತಿಗಳು ಮರಣವನ್ನಪ್ಪಿದ್ದರೂ ಸಹ ಅವರ ಹೆಸರು ಮತಪಟ್ಟಿಯಲ್ಲಿ ಇರಿಸಲಾಗಿದೆ, ಇಂತಹ ೧೬ ಸಾವಿರ ಪ್ರಕರಣಗಳು ಸಂಶಯವಿದೆ ಎಂದು ನಾವು ಆಕ್ಷೇಪಣೆ ಸಲ್ಲಿಸಿದ್ದೇವೆ ಎಂದು ವಿಜಯಪುರ ನಗರ ಶಾಸಕ ಬಸನಗೌಡ ಪಾಟೀಲ ಯತ್ನಾಳ ಹೇಳಿದರು.
ಈ ಕುರಿತಾದ ಮಹತ್ವದ ದಾಖಲೆ ಹಾಗೂ ಎರಡು ಕಡೆ ಇರುವ ಮತದಾರರ ಪಟ್ಟಿಯ ಛಾಯಾಚಿತ್ರ ಸಮೇತವಾಗಿ ವಿವರಣೆ, ಮರಣವನ್ನಪ್ಪಿ ಅವರ ಮರಣ ಉತಾರೆ ಲಗತ್ತಿಸಿ ಆಕ್ಷೇಪಣೆ ಸಲ್ಲಿಸಿದ ಸಮಗ್ರ ದಾಖಲೆಯನ್ನು ಯತ್ನಾಳ ಬಿಡುಗಡೆಗೊಳಿಸಿದರು.
ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕೆಲವು ವ್ಯಕ್ತಿಗಳು ಜನ್ನತ್ಗೆ ಹೋಗಿ ವಾಪಸ್ಸು ಬಂದರೆ ಅದು ವಿಜಯಪುರ ನಗರ ವಿಧಾನಸಭಾ ಕ್ಷೇತ್ರದಲ್ಲಿಯೇ ಮಾತ್ರ, ನಮ್ಮ ಹಿಂದೂ ಬಾಂಧವರು ಸಂಸ್ಕಾರವಂತರು, ಸತ್ತವರ ಹೆಸರಿನಲ್ಲಿ ಮತದಾನ ಮಾಡುವ ಹೇಯ ಕೃತ್ಯ ಯಾರೂ ಮಾಡಲ್ಲ. ಈ ರೀತಿ ಮಾಡುವವರು ಅವರು ಮಾತ್ರ. ಹೀಗಾಗಿ ಇಬ್ರಾಹಿಂ ಆದಿಲ್ಷಾಹಿ ಕಾಲದಿಂದಲೂ ಅವರ ಹೆಸರುಗಳು ಇಂದಿಗೂ ಇವೆ ಎಂದು ಲೇವಡಿ ಮಾಡಿದರು.
ಭಾರತೀಯ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶಕುಮಾರ ಓರ್ವ ದಕ್ಷ ಅಧಿಕಾರಿ, ಅವರು ಯಾವ ಪಕ್ಷದ ಏಜೆಂಟರೂ ಅಲ್ಲ, ಈ ಹಿಂದೆ ಚುನಾವಣಾ ಆಯೋಗವನ್ನು ಯಾವ ರೀತಿ ಕಾಂಗ್ರೆಸ್ ದುರಪಯೋಗಪಡಿಸಿಕೊಂಡಿದೆ ಎಂಬುದು ಪ್ರತಿಯೊಬ್ಬರಿಗೂ ಗೊತ್ತಿದೆ. ಜಿಲ್ಲಾ ಉಸ್ತುವಾರಿ ಸಚಿವರು ತಮ್ಮ ಘನತೆ ಬದಿಗೊತ್ತಿ ಚುನಾವಣಾ ಮುಖ್ಯ ಆಯುಕ್ತರ ಪ್ರತಿಕೃತಿ ದಹಿಸಿರುವುದು ಅವರಿಗೆ ಶೋಭೆ ತರುವ ಸಂಗತಿಯಲ್ಲ ಎಂದು ವಾಗ್ದಾಳಿ ನಡೆಸಿದರು.
ಚುನಾವಣಾ ಆಯೋಗದ ಮುಖ್ಯ ಆಯುಕ್ತರಿಗೆ ಅವಮಾನ, ರಾಜ್ಯದ ರೈತರಿಗೆ ಬರ ಪರಿಹಾರ ಘೋಷಣೆ ಮೊದಲಾದ ವಿಷಯಗಳನ್ನಿಟ್ಟುಕೊಂಡು ಅ.೬ ರಂದು ಬೃಹತ್ ಪ್ರತಿಭಟನಾ ರ್ಯಾಲಿ ನಡೆಸಲು ತೀರ್ಮಾನ ಕೈಗೊಳ್ಳಲಾಗಿದೆ ಎಂದರು.
ಪಾಲಿಕೆ ಮೇಯರ್ ಎಂ.ಎಸ್. ಕರಡಿ, ಪಾಲಿಕೆ ಸದಸ್ಯರಾದ ಪ್ರೇಮಾನಂದ ಬಿರಾದಾರ, ಗಿರೀಶ ಬಿರಾದಾರ, ರಾಜು ಕುರಿಯವರ, ಜವಾಹರ್ ಗೋಸಾವಿ, ಕಿರಣ ಪಾಟೀಲ, ರಾಜೇಶ ದೇವಗಿರಿ, ರಾಹುಲ್ ಜಾಧವ, ಕುಮಾರ ಗಡಗಿ, ಮುಖಂಡರಾದ ಚಂದ್ರು ಚೌಧರಿ, ಗುರು ಗಚ್ಚಿನಮಠ, ವಿಜಯಕುಮಾರ ಡೋಣಿ, ಶಂಕರ ಹೂಗಾರ, ಬಾಬು ಶಿರಶ್ಯಾಡ, ವಿಕ್ರಂ ಗಾಯಕವಾಡ ಮೊದಲಾದವರು ಪತ್ರಿಕಾಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.
ಆಕ್ಷೇಪಣೆ ಮರಳಿ ಪಡೆದಿಲ್ಲ
ಮುಸ್ಲಿಂ ಮತಗಳ ಆಕ್ಷೇಪಣೆಯನ್ನು ನಾವು ಸಲ್ಲಿಸಿದ್ದೇವೆ, ಆದರೆ ನಾವು ಆಕ್ಷೇಪಣೆ ಮರಳಿ ಪಡೆದಿಲ್ಲ, ಸಚಿವ ಎಂ.ಬಿ.ಪಾಟೀಲರು ಈ ಬಗ್ಗೆ ಹೇಳಿದರೆ ಅದೇನು ವೇದ ವಾಕ್ಯವೇ? ಎಂದು ಶಾಸಕ ಯತ್ನಾಳ ಹೇಳಿದರು.
ನಮಗೆ ೧೬ ಸಾವಿರಕ್ಕೂ ಹೆಚ್ಚು ಮತದಾರರಿಗೆ ಸಂಬಂಧಿಸಿದಂತೆ ಡೌಟ್ ಇದೆ, ದಾಖಲೆ ಸಮೇತ ನಾವು ಆಕ್ಷೇಪಣೆ ಸಲ್ಲಿಕೆ ಮಾಡಿದ್ದೇವೆ, ಇದನ್ನು ಹಿಂದಕ್ಕೆ ಪಡೆಯುವ ಪ್ರಶ್ನೆಯೇ ಇಲ್ಲ ಎಂದರು.
ಬಲ್ಕ್ ಆಗಿ ಆಕ್ಷೇಪಣೆ ಸಲ್ಲಿಸುವ ಅವಕಾಶವಿದೆ, ನಾವು ನಿಯಮಾವಳಿಗಳ ಪ್ರಕಾರವೇ ೮೩೦೦ ಕ್ಕೂ ಹೆಚ್ಚು ಆಕ್ಷೇಪಣೆಗಳನ್ನು ಸಲ್ಲಿಕೆ ಮಾಡಲಾಗಿದೆ ಎಂದರು.
ಮುಸ್ಲಿಂ ಸಂಘಟನೆಗಳಿಂದ ಎಸ್ಐಆರ್ ಪ್ರಕ್ರಿಯೆಯಲ್ಲಿ ಹಸ್ತಕ್ಷೇಪ
ಬಿಎಲ್ಓಗಳು ಮನೆ-ಮನೆಗೆ ಹೋಗಬೇಕು, ಆದರೆ ಕೆಲವು ಮತಾಂಧ ಶಕ್ತಿಗಳು ರೆಹಮಾನ್ ಫೌಂಡೇಷನ್, ಸನಾ ಫೌಂಡೇಷನ್ ಮೊದಲಾದ ಸಂಘಟನೆಗಳು ಈ ಪ್ರಕ್ರಿಯೆಗೆ ಧಕ್ಕೆ ತರಲು ಕಾನೂನು ಬಾಹಿರವಾಗಿ ಎಸ್ಐಆರ್ ಪ್ರಕ್ರಿಯೆಯಲ್ಲಿ ಹಸ್ತಕ್ಷೇಪ ಮಾಡುತ್ತಿವೆ, ಜೊತೆಗೆ ನಮ್ಮ ಕಾರ್ಯಕರ್ತರ ಮೇಲೆಯೂ ಹಲ್ಲೆ ನಡೆಸಿದ್ದಾರೆ, ಪಾಲಿಕೆಯ ಮಾಜಿ ಸದಸ್ಯನೋರ್ವ ತನ್ನ ಒಡೆತನದ ಶಾಲೆಯಲ್ಲಿ ಬಿಎಲ್ಓಗಳ ಸಭೆಯನ್ನು ಕಾನೂನುಬಾಹಿರವಾಗಿ ಕರೆದಿದ್ದಾನೆ ಎಂದು ಶಾಸಕ ಯತ್ನಾಳ ಆರೋಪಿಸಿದರು.
