ವಿಜಯಪುರದಲ್ಲಿ ಜಿ.ಪಂ. ಮಾಜಿ ಸದಸ್ಯ ಪಂಚಪ್ಪ ಕಲಬುರಗಿ ಒತ್ತಾಯ
ಉದಯರಶ್ಮಿ ದಿನಪತ್ರಿಕೆ
ವಿಜಯಪುರ: ಕಬ್ಬು ಬೆಳೆಗಾರರ ಸಮಸ್ಯೆ ಒಂದು ಗಂಭೀರವಾದ ಸಮಸ್ಯೆ, ಈ ಸಮಸ್ಯೆ ಬಗೆ ಹರಿಸುವ ನಿಟ್ಟಿನಲ್ಲಿ ಪ್ರಧಾನಮಂತ್ರಿಗಳೇ ಮಧ್ಯಸ್ಥಿಕೆ ವಹಿಸಬೇಕು ಎಂದು ರೈತ ಮುಖಂಡ ಪಂಚಪ್ಪ ಕಲಬುರಗಿ ಒತ್ತಾಯಿಸಿದರು.
ನಗರದಲ್ಲಿ ಶನಿವಾರ ಸುದ್ದಿಗೋಷ್ಠಿ‌ಯಲ್ಲಿ ಮಾತನಾಡಿದ ಅವರು, ಎಂ.ಎಸ್.ಪಿ ಎಂದರೆ ಮಿನಿಮಮ್ ಸಪೋರ್ಟ್ ಪ್ರೈಸ್ ಪರಿಷ್ಕರಣೆಯೇ ಆಗಿಲ್ಲ. ಆದರೆ ಈ ದರ ಕಳೆದ ೯ ವರ್ಷಗಳಿಂದ ಈ ದರ ಪರಿಷ್ಕರಣೆಯಾಗಿಲ್ಲ, ಆದರೆ ಈ ೯ ವರ್ಷದ ಅವಧಿಯಲ್ಲಿ ಕಬ್ಬು ಉತ್ಪಾದನಾ ವೆಚ್ಚ ಮೂರ್ನಾಲ್ಕು ಪಟ್ಟು ಹೆಚ್ಚಾಗಿದೆ, ಕೃಷಿ ಕಾರ್ಮಿಕರ ವೆಚ್ಚ, ಗೊಬ್ಬರಗಳ ವೆಚ್ಚ, ಪೆಟ್ರೋಲ್ ಡಿಸೈಲ್ ಬೆಲೆ ದುಪ್ಪಟ್ಟಾಗಿದೆ, ಆದರೆ ಇದಕ್ಕೆ ತಕ್ಕಂತೆ ಮಿನಿಮಮ್ ಸಪೋರ್ಟ್ ಪ್ರೈಸ್ ಮಾತ್ರ ಪರಿಷ್ಕರಣೆಯಾಗಿಲ್ಲ. ಕೂಡಲೇ ಪ್ರತಿ ಟನ್ ಕಬ್ಬಿಗೆ ೬೦ ರೂ. ಪರಿಷ್ಕರಣೆ ಮಾಡಬೇಕು ಎಂದರು.
ಕೇಂದ್ರ ಸರ್ಕಾರ ಮಾಡಿರುವ ಅನೇಕ ಬದಲಾವಣೆಗಳು ಕಬ್ಬು ಬೆಳೆಗಾರರಿಗೆ ಮಾರಕವಾಗಿವೆ, ಈ ಹಿಂದೆ ಇದ್ದ ಸರಾಸರಿ ಶೇ.೯.೫ ಇಳುವರಿಯನ್ನು ಶೇ.೧೦.೫ ಏರಿಕೆ ಮಾಡಿದೆ, ಈ ನಿರ್ಧಾರದಿಂದ ರೈತರಿಗೆ ಪ್ರತಿ ಟನ್ ಕಬ್ಬಿಗೆ ೨೦೦ ರೂ. ನಷ್ಟವಾಗುತ್ತದೆ, ಕಟಾವು ಹಾಗೂ ಸಾಗಾಣಿಕೆ ವೆಚ್ಚ ರೈತರಿಗೆ ಹೊರೆಸಿದೆ ಎಂದರು.
ಇದು ಕರ್ನಾಟಕಕ್ಕೆ ಮಾತ್ರ ಈ ಚಳವಳಿ ಸೀಮಿತವಾಗಿಲ್ಲ, ಇದು ಉತ್ತರ ಪ್ರದೇಶ ಸೇರಿದಂತೆ ಅನೇಕ ರಾಜ್ಯಗಳಿಗೂ ವ್ಯಾಪಿಸಲಿದೆ, ಹೀಗಾಗಿ ಪ್ರಧಾನಿ ಮೋದಿ ಅವರು ಎಚ್ಚೆತ್ತುಕೊಂಡು ಕೂಡಲೇ ಈ ವಿಷಯವಾಗಿ ಮಧ್ಯಸ್ಥಿಕೆ ವಹಿಸಬೇಕು ಎಂದರು.
ಸಕ್ಕರೆ ಕಾರ್ಖಾನೆಗಳು ಸಕ್ಕರೆ ಹೊರತುಪಡಿಸಿ ಉಳಿದ ಉತ್ಪನ್ನಗಳನ್ನು ಸಹ ತಯಾರಿಸುತ್ತದೆ, ಇದಕ್ಕೆ ಸರ್ಕಾರ ಸಹ ತೆರಿಗೆ ವಿಧಿಸುತ್ತದೆ, ಆದರೆ ಇದರ ಮೇಲೆ ರೈತರಿಗೆ ಪಾಲು ಬೇಡವೇ? ಇದು ನ್ಯಾಯವಲ್ಲವೇ? ಎಂದು ಪ್ರಶ್ನಿಸಿದರು.
ಪಕ್ಷದ ಮುಖಂಡರಾದ ರಾಜು ಹಿಪ್ಪರಗಿ, ಎಸ್.ಎಸ್. ಖಾದ್ರಿ ಇನಾಮದಾರ, ಎಸ್.ಬಿ. ಪಾಟೀಲ, ಸಂಜೀವ ಹಿರೇಮಠ ಮೊದಲಾದವರು ಪತ್ರಿಕಾಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.
ತೆಲಂಗಾಣಕ್ಕೆ ನೀರು ಹರಿಸಲು ಹಿಂಗಾರು ಹಂಗಾಮಿಗೆ ನೀರಿಲ್ಲವೇ?
ಆಲಮಟ್ಟಿ ಹಾಗೂ ನಾರಾಯಣಪೂರ ಜಲಾಶಯದಲ್ಲಿ ನೀರಿನ ಲಭ್ಯತೆ ಇದ್ದರೂ ಸಹ ಹಿಂಗಾರು ಅವಧಿಗೆ ಹೊಲಗಳಿಗೆ ನೀರು ಹರಿಸುವುದಿಲ್ಲ ಎಂಬ ಐಸಿಸಿ ನಿರ್ಣಯ ಸ್ವೀಕರಿಸಿರುವುದು ಯಾವ ನ್ಯಾಯ? ತೆಲಂಗಾಣದಲ್ಲಿ ನಿಮ್ಮ ಪಕ್ಷದ ಸರ್ಕಾರ ಇರುವುದರಿಂದ ಅವರಿಗೆ ನೀರು ಹರಿಸಲು ನಮ್ಮ ರೈತರಿಗೆ ಮೋಸ ಮಾಡುತ್ತಿದ್ದೀರಾ?
ಜಿಲ್ಲಾ ಪಂಚಾಯತ ಮಾಜಿ ಸದಸ್ಯ ಪಂಚಪ್ಪ ಕಲಬುರಗಿ ಖಾರವಾಗಿ ಪ್ರಶ್ನಿಸಿದರು.
ಕಬ್ಬು ಮೊದಲಾದವುಗಳಿಗೆ ಹಿಂಗಾರು ಹಂಗಾಮಿನಲ್ಲಿ ನೀರು ಹರಿಸಿ ಎಂದು ಕೇಳುತ್ತಿಲ್ಲ, ರೈತರು ಮೂರು ಹೊತ್ತಿನ ಊಟ ಮಾಡಲು ಜೋಳ, ಗೋದಿಯಂತಹ
ಮೂರು ತಿಂಗಳ ಅಲ್ಪಾವಧಿ ಬೆಳೆಗೆ ನೀರು ಹರಿಸಬೇಕು ಎಂದು ಕೇಳುತ್ತಿದ್ದೇವೆ ಎಂದರು.
ನೀರು ನಿರ್ವಹಣೆ ಸಭೆ ಹಿಂಗಾರು ಹಂಗಾಮಿಗೆ ನೀರು ಕೊಡುವುದಿಲ್ಲ ಎಂಬ ನಿರ್ಣಯ ತೆಗೆದುಕೊಂಡಿದೆ, ಇದು ಅನ್ಯಾಯದ ಪರಮಾವಧಿ, ಕೂಡಲೇ ಇದನ್ನು ವಾಪಸ್ಸು ಪಡೆಯಬೇಕು, ನಿಮಗೆ ನಮ್ಮ ರೈತರು ಬೇಕೋ ಅಥವಾ ನೆರೆಯ ರಾಜ್ಯದ ನಿಮ್ಮ ಪಕ್ಷದ ಕಾರ್ಯಕರ್ತರು ಬೇಕೋ ಎಂದು ಪಂಚಪ್ಪ ಪ್ರಶ್ನಿಸಿದರು.
