ಕವಿಗಳ ಲೇಖನಿ ಸಮಾಜಕ್ಕೆ ಕೈಗನ್ನಡಿಯಾಗಲಿ :ಕುಚಬಾಳ

ಉದಯರಶ್ಮಿ ದಿನಪತ್ರಿಕೆ

ಸಿಂದಗಿ: ಕವಿಗಳಿಗೆ ಲೇಖನಿಯೇ ಆಯುಧ. ವ್ಯವಸ್ಥೆಯಲ್ಲಿ ತಪ್ಪುಗಳನ್ನು ಹರಿತ ಲೇಖನಿಯಿಂದ ಸರಿಪಡಿಸಿ ಕವಿಗಳು ಸಮಾಜದ ಕೈಗನ್ನಡಿಯಾಗಬೇಕು ಎಂದು ಕನ್ನಡ ಸಾಹಿತ್ಯ ಗೆಳೆಯರ ಬಳಗದ ಅಧ್ಯಕ್ಷ ರಾಜಶೇಖರ ಕುಚಬಾಳ ಹೇಳಿದರು.
ಪಟ್ಟಣದ ಹೊರ ವಲಯದ ಶಾಂತಿನಿಕೇತನ ಪ್ರೌಢಶಾಲೆಯಲ್ಲಿ ಕನ್ನಡ ಸಾಹಿತ್ಯ ಗೆಳೆಯರ ಬಳಗ ಹಾಗೂ ನಬಿರೋಶನ್ ಪ್ರಕಾಶನ ಬೋರಗಿ ವತಿಯಿಂದ ನಾಡಹಬ್ಬ ದಸರಾ ಪ್ರಯುಕ್ತ ಹಮ್ಮಿಕೊಂಡ ಕವಿಗೋಷ್ಠಿ ಹಾಗೂ ಸನ್ಮಾನ ಸಮಾರಂಭದಲ್ಲಿ ಭಾಗವಹಿಸಿ ಮಾತನಾಡಿದರು. ಕಲುಷಿತಗೊಂಡ ಇಂದಿನ ಸಮಾಜವನ್ನು ಪರಿಶುದ್ಧ ಗೊಳಿಸಲು ಕವಿಗಳು, ಲೇಖಕರು, ಸಾಹಿತಿಗಳು ತಮ್ಮ ಬರವಣಿಗೆಯ ಮೂಲಕ ಶ್ರಮಿಸಬೇಕು ಎಂದರು.
ಅಧ್ಯಕ್ಷತೆ ವಹಿಸಿ ಮಾತನಾಡಿದ ಹಿರಿಯ ವರದಿಗಾರ ಶಾಂತು ಹಿರೇಮಠ ತಾಲೂಕಿನಲ್ಲಿ ಬಹಳಷ್ಟು ಉದಯೋನ್ಮುಖ ಕವಿಗಳು, ಕಲಾ ಆರಾಧಕರು ಸೇರಿದಂತೆ ಹಲವು ಪ್ರತಿಭೆಗಳಿವೆ ಅವರನ್ನು ಒಂದುಗೂಡಿಸಿ ಅವರಲ್ಲಿನ ಕಲಾ ಪ್ರತಿಭೆ ಹೊರ ಹಾಕಲು ಸಾಹಿತಿಕ ಮತ್ತು ಕಲಾ ಕಮ್ಮಟ ಶಿಬಿರಗಳನ್ನು ಏರ್ಪಡಿಸಬೇಕು ಎಂದರು.
ತಾಲೂಕು ಕಸಾಪ ಮಾಜಿ ಅಧ್ಯಕ್ಷ ಸಿದ್ಧಲಿಂಗ ಚೌಧರಿ, ವರದಿಗಾರ ಕಬೂಲ ಕೊಕಟನೂರ, ಉದ್ಯಮಿ ಸಿದ್ದು ಚಿಂಚೊಳ್ಳಿ, ವೈದ್ಯ ಶ್ರೀದೇವಿ ಬಿರಾದಾರ ಮಾತನಾಡಿದರು.
ಆರಕ್ಷಕ ಮೌಲಾಲಿ ಆಲಗೂರ ಸ್ವಾಗತ ಜೊತೆಗೆ ಪ್ರಸ್ತಾವಿಕ ಮಾತನಾಡಿ, ನಬಿರೋಶನ್ ಪ್ರಕಾಶನದ ಸಾಮಾಜಿಕ ಕೆಲಸಗಳ ಕುರಿತು ತಿಳಿಸಿದರು. ರಾಂಪೂರ ಆರೂಢ ಮಠದ ಪೀಠಾಧಿಪತಿ ನಿತ್ಯಾನಂದ ಮಹಾರಾಜರು ಆಶೀರ್ವಚನ ನೀಡಿದರು.
ಇದೆ ವೇಳೆ ಸಿಂದಗಿ, ಆಲಮೇಲ, ದೇವರ ಹಿಪ್ಪರಗಿ ಕರ್ನಾಟಕ ರಾಜ್ಯ ಪದವೀಧರ ಪ್ರಾಥಮಿಕ ಶಿಕ್ಷಕರ ಸಂಘದ ಪದಾಧಿಕಾರಿಗಳನ್ನು ಗೌರವಿಸಲಾಯಿತು.
ಕುದರತ ಅಲಿ ಭೂಸನೂರ, ಬಿ.ವಿ ಹಿರೇಮಠ, ಶಿವಕುಮಾರ ಶಿವಸಿಂಪಿಗೆರ, ಸುರೇಶ ಪೂಜಾರ, ಶರಣು ಲಂಗೋಟಿ ಸೇರಿದಂತೆ 20 ಹೆಚ್ಚು ಕವಿಗಳು ತಮ್ಮ ಸ್ವ ರಚಿತ ಕವನಗಳನ್ನು ವಾಚಿಸಿದರು.
ವೇದಿಕೆಯ ಮೇಲೆ ಶಿಕ್ಷಕಿ ಮೀನಾಕ್ಷಿ ವಾಘಮೋರೆ, ನಿವೃತ್ತ ಅಭಿಯಂತರ ತಾರಾನಾಥ ರಾಥೋಡ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.
ರಾಗ ರಂಜನಿ ಸಂಸ್ಥೆ ಪ್ರಕಾಶ ಮೂಡಲಗಿ ಪ್ರಾರ್ಥಿಸಿದರು, ಶಿಕ್ಷಕ ಬಸವರಾಜ ಅಗಸರ ನಿರೂಪಿಸಿ ವಂದಿಸಿದರು.